កិច្ចប្រជុំសាមញ្ញលើកទី៥ របស់ក្រុមប្រឹក្សារាជធានីភ្នំពេញអាណត្តិទី២
ថ្ងៃចេញផ្សាយ: Tuesday, April 28, 2015, 10:18 AM
ក្រុមប្រឹក្សារាជធានីភ្នំពេញអាណត្តិ២ បានបើកកិច្ចប្រជុំសាមញ្ញលើកទី៥ នាព្រឹកថ្ងៃទី០៧ ខែតុលា ឆ្នាំ ២០១៤ នៅសាលារាជធានីភ្នំពេញ ក្រោមអធិបតីភាព ឯកឧត្តម ម៉ប់ សារិន ប្រធាន ក្រុមប្រឹក្សា និងជាប្រធានអង្គប្រជុំ អង្គប្រជុំនេះមានការចូលរួមពីសមាជិក សមាជិកាក្រុមប្រឹក្សារាជធានីភ្នំពេញចំនួន ១៩រូប លើ២១រូប (អវត្តមាន២រូប មានច្បាប់អនុញ្ញាត១រូប និងសុំលាលែងពីមុខតំណែង ១រូប) គណៈអភិបាលរាជធានីភ្នំពេញចំនួន ៤រូប លើ៧រូប នាយក នាយករងរដ្ឋបាល នាយក នាយិកាទីចាត់ការសាលារាជធានីភ្នំពេញ និងប្រធានមន្ទីរ-អង្គភាពជុំវិញសាលារាជធានីភ្នំពេញចំនួន ៥៣រូប ព្រមទាំងតំណាងអង្គការក្រៅរដ្ឋាភិបាល និងតំណាងប្រជាពលរដ្ឋចំនួន ៩រូប សរុបវត្តមានទាំងអស់ចំនួន ៨៥រូប ។
កិច្ចប្រជុំក្រុមប្រឹក្សានេះមានរបៀបវារៈ
- របៀបវារៈរួម ក្រុមប្រឹក្សារាជធានីភ្នំពេញ បានអនុម័តគាំទ្រ ១៩ លើ១៩រូប។
- របៀបវារៈ ទី១ ក្រុមប្រឹក្សារាជធានីភ្នំពេញ បានអនុម័តកំណត់ហេតុកិច្ចប្រជុំសាមញ្ញលើកទី៤ របស់ក្រុមប្រឹក្សារាជធានីភ្នំពេញ អាណត្តិទី២ នៅថ្ងៃទី១១ ខែកញ្ញា ឆ្នាំ២០១៤ ដោយសម្លេងគាំទ្រ ១៨ លើ១៩រូប (មិនគាំទ្រ១រូប) ឯកភាពតាមខ្លឹមសារដើមនៃសេចក្តីព្រាង ។
- របៀបវារៈទី២ ក្រុមប្រឹក្សារាជធានីភ្នំពេញ បានអនុម័តរបាយការណ៍ប្រចាំត្រីមាសទី៣ ស្តីពីការអនុវត្តការងាររបស់រដ្ឋបាលរាជធានីភ្នំពេញ ដែលអានជូនដោយ លោក មាន ចាន់យ៉ាដា នាយក រដ្ឋបាលសាលារាជធានីភ្នំពេញដោយសម្លេងគាំទ្រ ១៩ លើ១៩រូប ឯកភាពតាមខ្លឹមសារដើមនៃសេចក្តីព្រាង ក្រោយពីបានកែសម្រួលនូវចំណុចមួយចំនួន។
- របៀបវារៈ ទី៣ ក្រុមប្រឹក្សារាជធានីភ្នំពេញ បានអនុម័តសេចក្តីសម្រេច ស្តីពីការបង្កើតក្រុមការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលប្រចាំឆ្នាំ រាជធានីភ្នំពេញ និងប្រតិទិនការងារសម្រាប់ការកសាងផែនការអភិវឌ្ឍន៍រាជធានីភ្នំពេញ (២០១៥-២០១៩) ដោយសំឡេងគាំទ្រ ១៩ លើ១៩រូប ឯកភាពតាមខ្លឹមសារដើមនៃសេចក្តីព្រាង ។
ជាមួយ នេះដែរ អង្គប្រជុំបានកោតសរសើរដល់គណៈអភិបាលរាជធានីភ្នំពេញ ដែលបានអនុវត្តការងារបានល្អប្រសើរ និងបានលើកឡើងនូវការងារមួយចំនួន រួមមាន៖
- ការធ្វើអត្តសញ្ញាណប័ណ្ណសញ្ជាតិខ្មែរ និងសៀវភៅគ្រួសារ មានភាពយឺតយ៉ាវ ។
- ស្នើរសុំផ្តល់តារាងបញ្ជីរាយនាមឈ្មោះរបស់បុគ្គលិកមន្ត្រីរាជការសាលារាជធានីភ្នំពេញជូនក្រុមប្រឹក្សាបានជ្រាប
- ចាត់វិធានការ ផ្លូវច្បាប់ចំពោះអ្នកបើកបរហូបគ្រឿងស្រវឹង និងសេធគ្រឿងញៀនញ ដែលបង្កគ្រោះថ្នាក់ចរាចរណ៍រហូតដល់បាត់បង់អាយុជីវិតរបស់ប្រជាពលរដ្ឋ ។
- ជួយ អន្តរាគមន៍ទៅរដ្ឋករទឹកស្វយ័តក្រុងភ្នំពេញ ក្នុងការតបណ្តាញទឹកស្អាត នៅភូមិត្រពាំងរាំង ខណ្ឌសែនសុខ ព្រោះមិនទាន់មានទឹកស្អាតប្រើប្រាស់ ។
- ចាត់ក្រុមការងារចុះត្រួតពិនិត្យអាជិវកម្មបូមខ្សាច់ និងដី ដើម្បីទប់ស្កាត់ការជីករណ្តៅជ្រៅពេក ។
- ចាត់វិធានការផ្លូវច្បាប់ចំពោះរថយន្តធុនធ្ងន់ដឹកដី មិនត្រឹមត្រូវតាមលក្ខណៈបច្ចេកទេស ។
ឆ្លើយតបនឹងការលើកឡើងខាងលើ ឯកឧត្តម សេង រតនៈ អភិបាលរង និងជាតំណាងឯកឧត្តមអភិបាលរាជធានីភ្នំពេញ បានបកស្រាយ និងបំភ្លឺជូនអង្គប្រជុំបានជ្រាបពីចំណាត់ការកន្លងមក និងនៅពេលខាងមុខរបស់រដ្ឋបាលរាជធានីភ្នំពេញ ព្រមទាំងទទួលយកនូវអនុសាសន៍ដែលអង្គប្រជុំបានលើកឡើងពាក់ព័ន្ធនឹង ការងាររដ្ឋបាលរបស់សាលារាជធានីភ្នំពេញ ដើម្បីធ្វើការកែសម្រួល ។
នាទីបញ្ចប់ ឯកឧត្តមប្រធានក្រុមប្រឹក្សារាជធានីភ្នំពេញ បានថ្លែងអំណរគុណដល់សមាជិក សមាជិកាដែលមានវត្តមានក្នុងអង្គប្រជុំ ហើយក៏បានជំរាបជូនអង្គប្រជុំពីការត្រៀមរៀបចំកិច្ចប្រជុំសាមញ្ញលើកទី៦ របស់ក្រុមប្រឹក្សារាជធានីភ្នំពេញអាណត្តិទី២ ដែលនឹងប្រព្រឹត្តទៅនៅថ្ងៃពុធ ទី១១ ខែវិច្ឆិកា ឆ្នាំ២០១៤ នៅសាលប្រជុំដដែលនេះ ។
