កិច្ចប្រជុំសាមញ្ញលើកទី៤ របស់ក្រុមប្រឹក្សារាជធានីភ្នំពេញអាណត្តិទី២
ថ្ងៃចេញផ្សាយ: Tuesday, April 28, 2015, 10:25 AM
ក្រុមប្រឹក្សារាជធានីភ្នំពេញអាណត្តិ២ បានបើកកិច្ចប្រជុំសាមញ្ញលើក ទី៤ នាព្រឹកថ្ងៃទី១១ ខែ កញ្ញា ឆ្នាំ ២០១៤ នៅសាលារាជធានីភ្នំពេញ ក្រោមអធិបតីភាព ឯកឧត្តម ម៉ប់ សារិន ប្រធានក្រុមប្រឹក្សា និងជាប្រធានអង្គប្រជុំ អង្គប្រជុំនេះមានការចូលរួមពីសមាជិក សមាជិកាក្រុមប្រឹក្សារាជធានីភ្នំពេញចំនួន ២១រូប លើ២១រូប គណៈអភិបាលរាជធានីភ្នំពេញចំនួន ២រូប លើ៧រូប នាយក នាយករងរដ្ឋបាល នាយក នាយិកាទីចាត់ការសាលារាជធានីភ្នំពេញ និងប្រធានមន្ទីរ-អង្គភាពជុំវិញសាលារាជធានីភ្នំពេញចំនួន ៥១រូប ព្រមទាំងតំណាងអង្គការក្រៅរដ្ឋាភិបាល និងតំណាងប្រជាពលរដ្ឋចំនួន ៩រូប សរុបវត្តមានទាំងអស់ចំនួន ៨៣រូប ។ កិច្ច ដំណើរការ និងនីតិវិធីនៃកិច្ចប្រជុំសាមញ្ញលើកទី២ នេះបានប្រព្រឹត្តត្រឹមត្រូវតាមប្រកាសលេខ១៦២៣ប្រក ចុះថ្ងៃទី២៦ ខែឧសភា ឆ្នាំ២០១៤។
កិច្ចប្រជុំក្រុមប្រឹក្សានេះមានរបៀបវារៈ
- របៀបវារៈ រួម ក្រុមប្រឹក្សារាជធានីភ្នំពេញ បានអនុម័តគាំទ្រ ១៥ លើ២១សម្លេង (មិនគាំទ្រ ៦សម្លេង ដោយដើរចេញពីកិច្ចប្រជុំចាប់ពីរបៀបវារៈទី១) ។
- របៀបវារៈ ទី១ ក្រុមប្រឹក្សារាជធានីភ្នំពេញ បានអនុម័តកំណត់ហេតុកិច្ចប្រជុំសាមញ្ញលើកទី៣ របស់ក្រុមប្រឹក្សារាជធានីភ្នំពេញ អាណត្តិទី២ នៅថ្ងៃទី១៣ ខែសីហា ឆ្នាំ២០១៤ ដោយសម្លេងគាំទ្រ ១៥ លើ១៥សម្លេង ឯកភាពតាមខ្លឹមសារដើមនៃសេចក្តីព្រាងទាំងស្រុង ក្រោយពីបានកែសម្រួលនូវចំណុចមួយចំនួន ។
- របៀបវារៈទី២ ក្រុមប្រឹក្សារាជធានីភ្នំពេញ បានអនុម័តរបាយការណ៍ប្រចាំខែសីហា ស្តីពីការអនុវត្តការងាររបស់រដ្ឋបាលរាជធានីភ្នំពេញ ដែលអានជូនដោយ លោក ហួត ហៃ នាយករងរដ្ឋបាលសាលារាជធានីភ្នំពេញដោយសម្លេងគាំទ្រ ១៥ លើ១៥សម្លេង ឯកភាពតាមខ្លឹមសារដើមនៃសេចក្តីព្រាង ក្រោយពីបានកែសម្រួលនូវចំណុចមួយចំនួន ។
- របៀបវារៈទី៣ ក្រុមប្រឹក្សារាជធានីភ្នំពេញ បានអនុម័តសេចក្តីសម្រេច ស្តីពីការទទួលស្គាល់ប្រធាន អនុប្រធាន និងសមាជិកគណៈកម្មាធិការសម្របសម្រួលបច្ចេកទេសរបស់ក្រុមប្រឹក្សារាជធានី ភ្នំពេញ អាណត្តិទី២ ដោយសម្លេងគាំទ្រ ១៥ លើ១៥សម្លេង ឯកភាពតាមខ្លឹមសារដើមនៃសេចក្តីព្រាងទាំងស្រុង ។
- របៀបវារៈទី៤ ក្រុមប្រឹក្សារាជធានីភ្នំពេញ បានអនុម័តសេចក្តីសម្រេច ស្តីពីការបង្កើតគណៈកម្មាធិការលទ្ធកម្មរបស់ក្រុមប្រឹក្សារាជធានី ភ្នំពេញ អាណត្តិទី២ ដោយសម្លេងគាំទ្រ ១៥ លើ១៥សម្លេង ឯកភាពតាមខ្លឹមសារដើម នៃសេចក្តីព្រាងទាំងស្រុង ។
- របៀបវារៈទី៥ ពិភាក្សាអំពីការរៀបចំគណៈកម្មការ ឬ ក្រុមការងារសម្រាប់ត្រៀមរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី២ នៅតាមខណ្ឌទាំង១២ ។ ជាមួយនេះដែរ អង្គប្រជុំបានកោត
សរសើរដល់គណៈអភិបាលរាជធានីភ្នំពេញ ដែលបានអនុវត្តការងារបានល្អប្រសើរ ហើយក៏បានលើកឡើងនូវបញ្ហាមួយចំនួន រួមមាន៖
- ការធ្វើអត្តសញ្ញាណប័ណ្ណសញ្ជាតិខ្មែរ និងសៀវភៅគ្រួសារ មានភាពយឺតយ៉ាវ ។
- ការប្រមូលសំរាមរបស់ក្រុមហ៊ុន ស៊ីនទ្រី នៅតាមគោលដៅសំខាន់ៗ ក្នុងខណ្ឌទាំង១២ មិនបានទាន់ពេលវេលា។
- ធ្វើការ ត្រិះរិះឱ្យបានល្អិតល្អន់ក្នុងការបង្កើតគណៈកម្មការ និងក្រុមការងារសម្រាប់ត្រៀមរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី២ នៅតាមខណ្ឌទាំង១២ ដើម្បីឆ្លើយតបនឹងសំណើ សំណូមពរ របស់ប្រជាពលរដ្ឋដែលបានលើកឡើងនៅក្នុងវេទិកាបានទាន់ពេលវេលា ។
ឆ្លើយតបនឹងការលើកឡើងខាងលើ ឯកឧត្តម សេង រតនៈ អភិបាលរង និងជាតំណាងឯកឧត្តមអភិបាលរាជធានីភ្នំពេញ បានបកស្រាយ និងបំភ្លឺជូនអង្គប្រជុំបានជ្រាបពីចំណាត់ការកន្លងមក និងនៅពេលខាងមុខរបស់រដ្ឋបាលរាជធានីភ្នំពេញ ព្រមទាំងទទួលយកនូវអនុសាសន៍ដែលអង្គប្រជុំបានលើកឡើងពាក់ព័ន្ធនឹងការងារ រដ្ឋបាលរបស់សាលារាជធានីភ្នំពេញ ដើម្បីធ្វើការកែសម្រួល ។
នាទីបញ្ចប់ ឯកឧត្តមប្រធានក្រុមប្រឹក្សារាជធានីភ្នំពេញ បានថ្លែងអំណរគុណដល់សមាជិក សមាជិកាដែលមានវត្តមានក្នុងអង្គប្រជុំ ហើយក៏បានជំរាបជូនអង្គប្រជុំពីការត្រៀមរៀបចំកិច្ចប្រជុំសាមញ្ញលើកទី៥ របស់ក្រុមប្រឹក្សារាជធានីភ្នំពេញអាណត្តិទី២ ដែលនឹងប្រព្រឹត្តទៅនៅថ្ងៃពុធ ទី០៧ ខែតុលា ឆ្នាំ២០១៤ នៅសាលប្រជុំដដែលនេះ ។
