ព្រឹកថ្ងៃទី១៤ ខែតុលា ឆ្នាំ២០១៤ លោក នុត ពុធដារ៉ា អភិបាល នៃគណៈ អភិបាលខណ្ឌដង្កោ និងជាប្រធានកិត្តិយសអនុសាខាកាកបាទក្រហមកម្ពុជា ខណ្ឌដង្កោ បាននាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ទៅចែកជូនប្រជាពលរដ្ឋក្រីក្រ១០គ្រួសារ ដែលរស់នៅក្នុងសង្កាត់ប្រទះឡាង ខណ្ឌដង្កោ។
លោក នុត ពុធដារ៉ា បានពាំនាំនូវការសាកសួរសុខទុក្ខពីសំណាក់សម្តេច កិត្តិព្រឹទ្ធបណ្ឌិតប្រធានកាកបាទក្រហមកម្ពុជា និងឯកឧត្តម ប៉ា សុជាតិវង្ស អភិបាល នៃគណៈអភិបាលរាជធានីភ្នំពេញ និងជាប្រធានសាខាកាកបាទក្រហមកម្ពុជារាជធានីភ្នំពេញ ដែល ជានិច្ចកាលតែងយកចិត្តទុកដាក់ និងគិតគូអំពីសុខទុក្ខ និងការលំបាករបស់បងប្អូនប្រជាពលរដ្ឋដែលរស់នៅទូទាំង ប្រទេស និងតែងបាននាំយកអំណោយសង្គ្រោះទៅចែកជូនដល់ប្រជាពលរដ្ឋ ដែលជួបការលំបាក និងជនរងគ្រោះ នានា។ លោកអភិបាលខណ្ឌ ក៏បានលើកឡើងអំពីការអភិវឌ្ឍរបស់ប្រទេសជាតិ ក្រោមការដឹកនាំរបស់សម្តេច អគ្គមហាសេនាបតី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើឲ្យប្រជាពលរដ្ឋទាំងអស់ រស់នៅប្រកបដោយសន្តិភាព និងសេចក្តីសុខ និងអភិវឌ្ឍលើគ្រប់វិស័យ។
អំណោយដែលចែកជូនបងប្អូនទាំង១០ គ្រួសារក្នុងឱកាសនោះរួមមាន៖ អង្ករ ៣០គីឡូក្រាម, មី ០២ កេស, ទឹកត្រី ០១យួរ, ទឹកស៊ីអ៊ីវ០១យួរ, ឆ្នាំងបាយ០១,ធុងទឹកកក០១,បំពង់ទឹកក្តៅ០១, ត្រីខ០៥កំប៉ុង, អំបិល០១ គីឡូក្រាម , ទឹកក្រូច០៧កំប៉ុង, ទឹកដោះគោ០៣កំប៉ុង, ស្ករស០៣កញ្ចប់, តែ០២កញ្ចប់, ធូបមូស០៣ប្រអប់ និង ថវិកា ១០ម៉ឺនរៀល។
