ការគ្រប់គ្រងសំណង់ _និងការអភិវឌ្ឍដីធ្លីក្នុងរាជធានីភ្នំពេញ នៅព្រឹកថ្ងៃទី០៨ ខែសីហា ឆ្នាំ២០១៧ ឯកឧត្តម អៀង អូននី អភិបាលរង នៃគណៈអភិបាលរាជធានីភ្នំពេញ បានប្រជុំស្ដីពីការគ្រប់គ្រងសំណង់ និងការអភិវឌ្ឍដីធ្លីក្នុងរាជធានីភ្នំពេញ។
អង្គប្រជុំបានលើកឡើងពីបញ្ហាប្រឈមដែលទាក់ទងទៅនឹងការសាងសង់ខុសច្បាប់ ការរំលោភទីសាធារណៈដោយការដ្ឋានសំណង់ ការសង់ខុសបច្ចេកទេស ការសង់ខុសច្បាប់ ការសង់គ្មានច្បាប់ជាដើម ដែលទាមទារឱ្យរដ្ឋបាលរាជធានីភ្នំពេញត្រូវមានវិធានការរដ្ឋបាល និងច្បាប់ ក្នុងការពិនិត្យ ការអនុញ្ញាត ការគ្រប់គ្រង និងឈានដល់ការហាមឃាត់សំណងខុសច្បាប់ ខុសបច្ចេកទេស ឬខុសពីការស្នើសុំជាដើម។
ឯកឧត្ដមប្រធានអង្គប្រជុំ ឱ្យមន្ទីរជំនាញត្រូវរៀបចំឯកសារ និងលិខិតបទដ្ឋានគតិយុត្ដិ ដើម្បីពិនិត្យ និងមានវិធានការចំពោះគម្រោងអភិវឌ្ឍ និងសំណង់ខុសច្បាប់ ព្រមទាំងបានលើកឡើងពីស្ថានភាពក្នុងការគ្រប់គ្រងការចាក់ដី ការសង់ផ្ទះល្វែង ការកែមុខងារដី និងបទដ្ឋានបច្ចេកទេស។ បន្ថែមពីលើនេះ ស្របតាមការណែនាំរបស់អភិបាលរាជធានី និងស្មារតីអង្គប្រជុំ ត្រូវពិនិត្យ និងមានវិធានការចំពោះម្ចាស់អាជីវកម្ម និងសំណង់ដែលមានខ្សាច់ចាក់រំលោភផ្លូវសាធារណៈ ឬប្រព័ន្ធលូផងដែរ។
