ត្រៀមលក្ខណៈក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក កាលពីល្ងាចម្សិល នៅព្រឹកថ្ងៃទី២១ ខែតុលា ឆ្នាំ២០១៧

ក្រោយពីប្រជុំការងារលម្អិតសម្រាប់ត្រៀមលក្ខណៈក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក កាលពីល្ងាចម្សិល នៅព្រឹកថ្ងៃទី២១ ខែតុលា ឆ្នាំ២០១៧នេះ ឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំមន្ត្រីពាក់ព័ន្ធចុះពិនិត្យការងារជាក់ស្តែងតាមគោលដៅនីមួយៗ។ ការងាររៀបចំប្រទីបរដ្ឋបាលរាជធានីភ្នំពេញ នឹងសម្រេចជាស្ថាពរនៅមុនថ្ងៃទី២៥ ខែតុលា ឆ្នាំ២០១៧ ខាងមុខ។ បន្ទាប់មកក្រុមការងារបានបន្តពិនិត្យការងារតុបតែងលម្អតាមសួនច្បារនៅត្រើយខាងកើត និងទីតាំងស្នាក់នៅរបស់ចំណុះទូកនៅក្នុងតំបន់អភិវឌ្ឍន៍ជ្រោយចង្វារ។ ដើម្បីបង្កលក្ខណៈងាយស្រួលដល់ការស្នាក់នៅរបស់បងប្អូនចំណុះទូក រដ្ឋបាលរាជធានីភ្នំពេញនឹងរៀបចំធ្វើរោងបែងចែកតាមទូកនីមួយៗ ដោយមានតភ្ជាប់ជូននូវទឹកស្អាត ភ្លើងអគ្គិសនី បង្គន់អនាម័យ បន្ទប់ទឹក និងកន្លែងសង្គ្រោះបឋមក្នុងតំបន់នេះផងដែរ។