(Khmer) កិច្ចប្រជុំសាមញ្ញលើកទី១២ របស់ក្រុមប្រឹក្សារាជធានីភ្នំពេញ អាណត្តិទី២
Published Date: Wednesday, June 03, 2015, 4:28 PM
(Khmer)
ក្រុមប្រឹក្សារាជធានីភ្នំពេញអាណត្តិ២ បានបើកកិច្ចប្រជុំសាមញ្ញលើក ទី១២ នាព្រឹកថ្ងៃទី៧ ខែ ឧសភា ឆ្នាំ ២០១៥ នៅសាលារាជធានីភ្នំពេញ ក្រោមអធិបតីភាព ឯកឧត្តម ម៉ប់ សារិន ប្រធានក្រុមប្រឹក្សា និងជាប្រធានអង្គប្រជុំ អង្គប្រជុំនេះមានការចូលរួមពីសមាជិក សមាជិកាក្រុមប្រឹក្សារាជធានីភ្នំពេញចំនួន ២១រូប លើ២១រូប គណៈអភិបាលរាជធានីភ្នំពេញចំនួន ៣រូប លើ៧រូប នាយក នាយករងរដ្ឋបាល នាយក នាយិកាទីចាត់ការសាលារាជធានីភ្នំពេញ និងប្រធានមន្ទីរ-អង្គភាពជុំវិញសាលារាជធានីភ្នំពេញចំនួន ៥៣រូប ព្រមទាំងតំណាងអង្គការក្រៅរដ្ឋាភិបាល និងតំណាងប្រជាពលរដ្ឋចំនួន ៦រូប សរុបវត្តមានទាំងអស់ចំនួន ៨៣រូប ។
កិច្ចប្រជុំក្រុមប្រឹក្សានេះមានរបៀបវារៈ
- របៀបវារៈរួម ក្រុមប្រឹក្សារាជធានីភ្នំពេញ បានអនុម័តដោយសំឡេងគាំទ្រ ២១ លើ២១រូប។
- របៀបវារៈ ទី១ ក្រុមប្រឹក្សារាជធានីភ្នំពេញ បានអនុម័តកំណត់ហេតុកិច្ចប្រជុំសាមញ្ញលើកទី១១ របស់ក្រុមប្រឹក្សារាជធានីភ្នំពេញ អាណត្តិទី២ នៅថ្ងៃទី០៨ ខែមេសា ឆ្នាំ២០១៥ ដោយសម្លេងគាំទ្រ ២១ លើ២១រូប ឯកភាពតាមខ្លឹមសារដើមនៃសេចក្តីព្រាងទាំងស្រុង។
- របៀបវារៈទី២ ក្រុមប្រឹក្សារាជធានីភ្នំពេញ បានអនុម័តរបាយការណ៍ប្រចាំខែមេសា ឆ្នាំ២០១៥ ស្តីពីការអនុវត្តការងាររបស់រដ្ឋបាលរាជធានីភ្នំពេញ ដែលអានជូនដោយ លោក មាន ចាន់យ៉ាដា នាយករដ្ឋបាលសាលារាជធានីភ្នំពេញ ដោយសម្លេងគាំទ្រ ១៥ លើ២១រូប(មិនគាំទ្រ ៦រូប) ឯកភាពតាមខ្លឹមសារដើមនៃសេចក្តីព្រាង ក្រោយពីបានកែសម្រួលនូវចំណុចមួយចំនួន ។
- របៀបវារៈទី៣ ក្រុមប្រឹក្សារាជធានីភ្នំពេញ បានធ្វើការបោះឆ្នោតជាសម្ងាត់ ដើម្បីតែងតាំងប្រធានការិយាល័យសេដ្ឋកិច្ចហិរញ្ញកិច្ច នៃមន្ទីររៀបចំដែនដី នគរូបនីយកម្មសំណង់ និងសុរិយោដីរាជធានីភ្នំពេញ និងប្រធានការិយាល័យបសុព្យាបាល នៃមន្ទីរកសិកម្មរាជធានីភ្នំពេញ។
ជាមួយនេះដែរ អង្គប្រជុំបានកោតសរសើរដល់គណៈអភិបាលរាជធានីភ្នំពេញដែលបានអនុវត្តការងាររបស់រដ្ឋបាល រាជធានីភ្នំពេញបានល្អប្រសើរ និងបានលើកឡើងនូវការងារមួយចំនួន រួមមាន៖
១-ភាពយឺតយ៉ាវក្នុងការរៀបចំឯកសារផ្លាស់ប្តូក្រុមប្រឹក្សាសង្កាត់។
២-ស្នើសុំបញ្ជាក់ពីការងារស្ថាបនាផ្លូវ វ៉េង ស្រេង និងប្រព័ន្ធលូ ថាតើជាគម្រោងស្ថាបនារួំ ឬយ៉ាងណា ព្រោះមានប្រជាពលរដ្ឋរអ៊ូរទាំងពីការធ្វើប្រព័ន្ធលូ ដោយមានអ្នកយកថវិកាពីប្រជាពលរដ្ឋពី ១៥ដុល្លារ ទៅ២០ដុល្លារ។
៣-ស្នើសុំឱ្យមានការគិតគូរពីប្រព័ន្ធរំដោះទឹក នៅក្នុងគម្រោងលុបបឹង ដើម្បីធ្វើការអភិវឌ្ឍ នៅផ្លូវ សឡា។
៤-ស្នើសុំរដ្ឋាករស្វយ័តទឹកក្រុងភ្នំពេញ ជួយពន្លឿនការងារតបណ្តាញទឹកស្អាតជូនប្រជាពលរដ្ឋ នៅភូមិត្រពាំងរាំង និងភូមិកប់ស្រូវ ក្នុងសង្កាត់ឃ្មួញ ខណ្ឌសែនសុខ។
ឆ្លើយតបនឹងការលើកឡើងខាងលើ លោកជំទាវ ម៉ក់ វណ្ណស៊ីថា អភិបាលរងរាជធានីភ្នំពេញ និងជាតំណាង ឯកឧត្តមអភិបាល នៃគណៈអភិបាលរាជធានីភ្នំពេញ បានបកស្រាយ និងបំភ្លឺជូនអង្គប្រជុំបានជ្រាបពីចំណាត់ការកន្លងមក និងនៅពេលខាងមុខរបស់រដ្ឋបាលរាជធានីភ្នំពេញ ព្រមទាំងទទួលយកនូវអនុសាសន៍ដែលអង្គប្រជុំបានលើកទលើងពាក់ព័ន្ធ នឹងការងាររដ្ឋបាលរបស់សាលារាជធានីភ្នំពេញដើម្បីការកែសម្រួលឱ្យកាន់តែល្អប្រសើរ។
នាទីបញ្ចប់ ឯកឧត្តមប្រធានក្រុមប្រឹក្សារាជធានីភ្នំពេញ បានថ្លែងអំណរគុណដល់សមាជិក សមាជិកាដែលមានវត្តមានក្នុងអង្គប្រជុំ ហើយក៏បានជំរាបជូនអង្គប្រជុំពីការត្រៀមរៀបចំកិច្ចប្រជុំសាមញ្ញលើកទី១៣ របស់ក្រុមប្រឹក្សារាជធានីភ្នំពេញអាណត្តិទី២ ដែលនឹងប្រព្រឹត្តទៅនៅថ្ងៃពុធ ទី០៩ ខែមិថុនា ឆ្នាំ២០១៥ នៅសាលប្រជុំអាគាររដ្ឋបាលថ្មីរបស់សាលារាជធានីភ្នំពេញ។
