បុណ្យកាន់បិណ្ឌ និងភ្ជុំបិណ្ឌ គឺជាបុណ្យប្រពៃណីរបស់ពុទ្ធសាសនិកជនកម្ពុជា មានអត្ថន័យយ៉ាងជ្រាលជ្រៅ ដែលធ្វើឡើងដើម្បីគោរព នឹករលឹក និងដឹងគុណ ចំពោះមាតាបិតាញាតិកាទាំង៧សណ្ដាន ឥស្សរជន វីរៈជន និងអ្នកស្នេហាជាតិ ដែលបានចែកឋានទៅលោកខាងមុខ ក្នុងបំណងឧទ្ទិកុសល ផលបុណ្យជូនដល់អ្នកទាំងនោះ ដែលភ្លាំងភ្លាត់ទៅកាន់អបាយភូមិ សូមអោយបានរួចរំដោះទៅកាន់សុគតិភព ។
ពាក់ព័ន្ធនឹងពិធីបុណ្យនេះ ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកជំទាវ ជា ស៊ីណា ឃួងស្រេង ព្រមទាំងមន្រ្តីរាជការ ចំណុះអោយរដ្ឋបាលរាជធានីភ្នំពេញ នាព្រឹកថ្ងៃទី១២ ខែតុលា ឆ្នាំ២០២៣ ត្រូវនឹងថ្ងៃកាន់បិណ្ឌវេនទី១២ បាននាំយកបច្ច័យចំនួន២៤លាន៨សែនរៀលនិង៧៤០ដុល្លារ ដែលបានពីសទ្ធាជ្រះថ្លារបស់មន្ត្រី ថ្នាក់ដឹកនាំ និងប្រជាពលរដ្ឋ វេរប្រគេនព្រះសង្ឃវត្តប្រសិទ្ធីរីម្មារាម សង្កាត់ពន្សាំង ខណ្ឌព្រែកព្នៅ។ ជាមួយគ្នានោះ ឯកឧត្ដម ឃួង ស្រេង និងលោកជំទាវ ជា ស៊ីណាឃួងស្រេង ព្រមទាំងមន្រ្តីរាជការ ចំណុះអោយរដ្ឋបាលរាជធានីភ្នំពេញ ក៏បាននាំយកនូវបង្អែម នំនែក ចង្ហាន់បិណ្ឌបាត្ររួម និងគ្រឿងឧបភោគបរិភោគ ទៅវេរប្រគេនដល់ព្រះសង្ឃ ព្រមទាំងរាប់បាត្របង្សុកូលទ្ទិសកុសលជូនដល់បុព្វការីជន ដែលបានចែកដ្ឋានទៅកាន់លោកខាងមុខ ។
ពិធីកាន់បិណ្ឌនេះ មិនត្រឹមតែបង្ហាញពីភាពកត្តញ្ញូរបស់កូនចៅ ចំពោះអ្នកមានគុណប៉ុណ្ណោះទេ ប៉ុន្តែបានបង្ហាញពីការរួបរួមសាមគ្គីគ្នារវាងព្រះសង្ឃ និងគ្រហស្ថ មន្ត្រីរាជការ អាជ្ញាធរ និងប្រជាពលរដ្ឋក្នុងមូលដ្ឋានដែលជាការរួមចំណែក ក្នុងការជួយទ្រទ្រង់ដល់វិសយ័ព្រះពុទ្ធសាសនា ជាសាសនារបស់រដ្ឋ និងជួយថែរក្សាប្រពៃណី ទំនៀមទំលាប់ កេរដំណែលដ៏ល្អប្រពៃ របស់ដូនតាយើងថែមទៀតផង។
គួរបញ្ជាក់ថា បុណ្យកាន់បិណ្ឌ និងភ្ជុំបិណ្ឌ ជាបុណ្យប្រពៃណីជាតិ ដែលប្រព្រឹត្តទៅពីថ្ងៃ១រោច ដល់ថ្ងៃ១៥ រោចខែភទ្របទ ត្រូវនឹងថ្ងៃទី៣០ ខែកញ្ញា ដល់ថ្ងៃទី១៤ ខែតុលា ឆ្នាំ២០២៣ ដែលថ្ងៃភ្ជុំបិណ្ឌ។ ក្នុងរដូវកាលនេះ ប្រជាពលរដ្ឋអ្នកកាន់ព្រះពុទ្ធសាសនាទីជិតទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្តាយនៅឯស្រុកកំណើត ដើម្បីរៀបចំម្ហូបអាហារ បាយសម្លរ ចង្ហាន់ យកទៅប្រគេនព្រះសង្ឃ ដែលគង់នៅតាមទីអារាមនានា និងបានឧទ្ទិសកុសលផលបុណ្យ ដែលបានកើតឡើង ពីកម្លាំងសទ្ធាជ្រះថ្លា ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ជូនដល់បុព្វការីជន មានមាតា បិតា ជីដូនជីតា ញាតិការទាំង៧សណ្តានដែលបានបាក់បែកចែកឋានទៅកាន់លោកខាងមុខហើយនោះ សូមបានទៅកាន់ឋានបរមសុខកុំបីឃ្លៀងឃ្លាតឡើយ៕
