អភិបាលរាជធានីភ្នំពេញ ឯកឧត្ដម ឃួង ស្រេង បានណែនាំឱ្យអាជ្ញាធរខណ្ឌចំការមន រៀបចំសណ្តាប់ធ្នាប់ និងអនាម័យបរិស្ថានអោយបានល្អប្រសើរ នៅជុំវិញវិមានរដ្ឋសភា ខណៈដែលកិច្ចប្រជុំសភានឹងឈានចូលមកដល់នៅថ្ងៃទី២១ សីហា ឆ្នាំ២០២៣ ខាងមុខនេះ។
ការណែនាំនេះបានធ្វើឡើង ខណៈដែលឯកឧត្តមដឹកនាំមន្ត្រីរដ្ឋបាលរាជធានីភ្នំពេញ និងអាជ្ញាធរខណ្ឌចំការមន ចុះពិនិត្យមើលការរៀបចំសណ្តាប់ធ្នាប់របៀបរៀបរយនៅជុំវិញវិមានរដ្ឋសភា ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ នារសៀលថ្ងៃទី១៦សីហា ២០២៣នេះ។
ឯកឧត្ដម ឃួង ស្រេង ក្នុងខណៈនៃការចុះពិនិត្យនោះ បានធ្វើការណែនាំថា សម្រាប់អាជ្ញាធរខណ្ឌចំការមន ដែលជាម្ចាស់មូលដ្ឋាន ត្រូវត្រៀមរៀបចំសណ្តាប់ធ្នាប់របៀបរៀបរយ និងអនាម័យបរិស្ថាន នៅជុំវិញវិមានរដ្ឋសភាអោយបានស្អាត ដោយចាប់ផ្តើមអនុវត្តចាប់ពីពេលនេះតទៅ ព្រោះថាកិច្ចប្រជុំសភា និងការស្បថចូលកាន់តំណែងសម្រាប់រាជរដ្ឋាភិបាលអាណត្តិថ្មី គ្រោងនឹងធ្វើឡើងនៅថ្ងៃទី២១និង២២សីហានេះហើយ។
គួរបញ្ជាក់ផងដែរថា៖ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញនៅសាលារាជធានីភ្នំពេញ កាលពីរសៀលថ្ងៃទី១៤ ខែសីហា ឆ្នាំ២០២៣ កន្លងមកនេះ ឯកឧត្តម ឃួង ស្រេង ក៏បានធ្វើការណែនាំរួចម្តងហើយដែរ ដោយជំរុញអោយអាជ្ញាធរខណ្ឌដែលមានរដ្ឋសភា និងបរមរាជវាំងនៅក្នុងមូលដ្ឋានរបស់ខ្លួន ត្រូវតែរៀបចំ សណ្ដាប់ធ្នាប់ អនាម័យ បរិស្ថាន អោយបានល្អជាមួយនឹងការរក្សាអោយបាននូវសន្តិសុខខ្ពស់បំផុត នៅទីតាំងទាំង២នេះ សម្រាប់ថ្ងៃទី២១ និង២២ សីហា ខាងមុខនេះ៕
