(Khmer) ឯកឧត្តមប្រធានក្រុមប្រឹក្សារាជធានីភ្នំពេញ កោតសរសើរ គណៈអភិបាលរាជធានីភ្នំពេញ លើកិច្ចការពារសន្តិសុខ សុវត្ថិភាព បានយ៉ាងល្អ ក្នុងដំណើរការយុទ្ធនាការឃោសនាបោះឆ្នោត ដោយជោគជ័យនិងគ្មានអំពើហឹង្សា

(Khmer)

            ប្រធានក្រុមប្រឹក្សារាជធានីភ្នំពេញ ឯកឧត្ដម ម៉ប់ សារិន បានថ្លែងនូវការកោតសរសើរ ចំពោះគណៈអភិបាលរាជធានីភ្នំពេញ, មន្រ្តីរាជការអាជ្ញាធរគ្រប់លំដាប់ថ្នាក់ និងអង្គភាពពាក់ព័ន្ធ ពិសេសគណៈបញ្ជាការឯកភាពខណ្ឌ សង្កាត់ បានបំពេញភារកិច្ចដោយស្មារតីទទួលខុសត្រូវខ្ពស់ ក្នុងកិច្ចការការពារសន្តិសុខ សុវត្ថិភាព និង សណ្តាប់ធ្នាប់ ធ្វើឱ្យដំណើរការយុទ្ធនាការឃោសនាបោះឆ្នោតប្រព្រឹត្តទៅដោយជោគជ័យ រលូន គ្មានអំពើហឹង្សា។

            ការកោតសរសើរដូច្នេះរបស់ឯកឧត្តមប្រធានក្រុមប្រឹក្សារាជធានីភ្នំពេញ បានធ្វើឡើងក្នុងកិច្ចប្រជុំសាមញ្ញ

លើកទី៣៧ របស់ក្រុមប្រឹក្សារាជធានីភ្នំពេញ អាណត្តិទី៣ នាថ្ងៃទី០៩ ខែមិថុនា ឆ្នាំ២០២២នេះ នៅសាលារាជធានីភ្នំពេញ។

            ឯកឧត្ដម  ម៉ប់ សារិន បានមានប្រសាសន៍លើកឡើងថា ៖ ក្រោមការដឹកនាំរបស់ ឯកឧត្តម ឃួង ស្រេង អភិបាលរាជធានីភ្នំពេញ បានបំពេញភារកិច្ចដោយស្មារតីទទួលខុសត្រូវខ្ពស់ ក្នុងកិច្ចការការពារសន្តិសុខ សុវត្ថិភាព និងសណ្តាប់ធ្នាប់ ធ្វើឱ្យដំណើរការយុទ្ធនាការឃោសនាបោះឆ្នោតប្រព្រឹត្តទៅដោយជោគជ័យ រលូន គ្មានអំពើហឹង្សា។ បានរារាំងទប់ស្កាត់សកម្មភាពរបស់អតីតបុគ្គលិក Naga World បានល្អ និងបានខិតខំប្រឹងប្រែងក្នុងការកាត់បន្ថយគ្រោះថ្នាក់ចរាចរនៅតាមដងផ្លូវក្នុងខែឧសភា ឆ្នាំ២០២២កន្លងមកនេះបានល្អប្រសើរ។

            ឯកឧត្ដម ម៉ប់ សារិន បានបន្តថា ៖ ក្នុងខែឧសភា ឆ្នាំ២០២២នេះ ឃើញថាមានកំណើនបរិមាណនៃការប្រមូលសំរាមជាមធ្យមក្នុង១ថ្ងៃ(៣.៧៩៥,៧៣តោន) ហើយត្រូវបានក្រុមហ៊ុនប្រមូល និងដឹកជញ្ជូនបានល្អនិងទាន់ពេលវេលា។ ប៉ុន្តែទោះបីជាយ៉ាងណាក្តី ឯកឧត្ដមប្រធានក្រុមប្រឹក្សារាជធានីភ្នំពេញ បានស្នើសុំឱ្យបន្តការផ្សព្វផ្សាយអំពីការប្រមូលវេចខ្ចប់ ការបញ្ចេញសំរាមតាមពេលកំណត់ដល់ខណ្ឌដែលមិនទាន់បានផ្សព្វផ្សាយ។

            ឯកឧត្ដម ឃួង ស្រេង ក្នុងកិច្ចប្រជុំនោះក៏បានជំរុញឱ្យស្ថាប័នពាក់ព័ន្ធ ពិសេសមន្ទីរសុខាភិបាល និងមន្ទីរអប់រំយុវជន និងកីឡារាជធានីភ្នំពេញជំរុញការចាក់វ៉ាក់សាំងជូនកុមារឱ្យបានគ្រប់ដុស ទៅតាមការកំណត់របស់ក្រសួងសុខាភិបាល។ ឯកឧត្តម ថា នៅលើពិភពលោក គេបានទទួលស្គាល់រួចហើយថា ប្រទេសកម្ពុជាជាប្រទេសមួយដែលទទួលបានការចាក់វ៉ាក់សាំងល្អជាងគេ ដោយរហូតមកដល់ពេលនេះ មិនមានអ្នកឆ្លងជំងឺកូវីដ-១៩នោះទេ។ ដូច្នេះកាេងារនេះយើងត្រូវរួមគ្នាប្រឹងប្រែងបន្ថែមទៀត ព្រោះថាមនុស្សម្នាក់មិនអាចទទួលការងារនេះ ទទួលបានជោគជ័យនោះទេ។

            ក្នុងឱកាសនោះដែរ ឯកឧត្ដម ឃួង ស្រេង ក៏បានលើកឡើងទៀតថា ៖ ចំពោះដើមឈើនៅក្នុងរាជធានីភ្នំពេញ ត្រូវតែអភិរក្សឱ្យបានល្អបំផុត។ ចំពោះដើមឈើចាស់ៗ ប្រហោងក្នុង ដែលអាចបង្កហានិភ័យដល់បងប្អូនប្រជាពលរដ្ឋអ្នកដំណើរ គឺអាចស្នើសុំកាប់បាន តែត្រូវដាំជំនួសមកវិញ សំដៅធ្វើយ៉ាងណាឱ្យរាជធានីភ្នំពេញ នៅរក្សាបានជាទីក្រុងមានពណ៌បៃតង និងបរិស្ថានល្អ៕