សារអភិបាលរាជធានី
រាជធានីភ្នំពេញ សូមស្វាគមន៍លោក-លោកស្រី ប្រជាពលរដ្ឋ និងប្រិយ៍មិត្តអ្នកអានទាំងអស់ជាទី រាប់អាន!
គេហទំព័រ ដែលសាលារាជធានីភ្នំពេញ បានបង្កើតឡើងនេះ គឺក្នុងគោលបំណងបង្ហាញអំពីទិន្ន័យព័ត៌មាន របាយការណ៍ ឯកសារស្រាវជ្រាវ រូបភាព សកម្មភាព ស្តីពីការអភិវឌ្ឍលើគ្រប់វិស័យ ដឹកនាំដោយគណៈអភិបាលរាជធានីភ្នំពេញ ។
គណៈអភិបាលរាជធានីភ្នំពេញក្នុងអណត្តិទី១ បានបំពេញតួនាទីជាស្ថាប័នរដ្ឋបាលថ្នាក់ក្រោមជាតិ ក្នុងនាមជាស្ថាប័នផ្តល់សេវាសាធារណៈឱ្យកាន់តែខិតជិតប្រជាពលរដ្ឋ ដើម្បីឆ្លើយតបទៅតាមតម្រូវការ និងផលប្រយោជន៍របស់អ្នកប្រើប្រាស់ ដោយឈរលើស្មារតីសហការក្នុងភាពជាដៃគូរ រវាងរដ្ឋ ឯកជន និងសង្គមស៊ីវិល ។ ក្នុងអណត្តិទី ២នេះ ភារកិច្ចសំខាន់របស់គណៈអភិបាល គឺផ្តោតទៅលើការស្តារហេដ្ឋារចនាសម្ព័ន្ធរូបវ័ន្តគ្រប់ប្រភេទ ការពង្រឹងគុណភាព សេវាសាធារណៈ ចរាចរណ៍ បរិស្ថាន សន្តិសុខ សណ្តាប់ធ្នាប់ សំដៅរួមចំណែកជួយលើកស្ទួយជីវភាពរស់នៅរបស់ប្រជាពលរដ្ឋពីមួយថ្ងៃទៅ មួយថ្ងៃ ឱ្យកាន់តែប្រសើរឡើងថែមទៀត ។
គេហទំព័រនេះ អាចដំណើរការប្រកបដោយគុណភាព ប្រសិទ្ធភាព និងរលូនទៅបាន អាស្រ័យដោយមានការចូលរួមផ្តល់មតិយោបល់ ព័ត៌មាន ទិន្នន័យ ឯកសារ ព្រមទាំងមតិរិះគន់ក្នុងន័យស្ថាបនាដែលជាមូលដ្ឋានក្នុងការជួយកែ លំអការអភិវឌ្ឍរាជធានី សំដៅធ្វើយ៉ាងណាឱ្យរាជធានីភ្នំពេញ ទទួលបានកិត្តិយស សេចក្តីថ្លៃថ្នូរ ស្ថេរភាព សុវត្ថិភាព សុខមាលភាព និងរបៀបរៀបរយសាធារណៈ សំរាប់ប្រជាពលរដ្ឋទូទៅ ។
ខ្ញុំសង្ឃឹមថា គេហទំព័រនេះពិតជាបានចូលរួមចំណែកក្នុងការចែករំលែកព័ត៌មាន សំរាប់ជាប្រយោជន៍ដល់លោក- លោកស្រី និងប្រជាពលរដ្ឋទាំងអស់ជាពុំខាន ៕
សូមអរគុណ !
