អភិបាល នៃគណៈអភិបាលរាជធានីភ្នំពេញ ឯកឧត្តម ឃួង ស្រេង នៅព្រឹកថ្ងៃទី១៤ខែតុលានេះ បានបែងចែកក្រុមការងារជា៣ក្រុម ចុះចែកអំណោយជូនប្រជាពលរដ្ឋនៅតាមផ្ទះនិមួយៗ នៅក្នុងសង្កាត់ចំនួន ៤ក្នុងខណ្ឌដង្កោ រាជធានីភ្នំពេញ ខណៈដែលប្រជាពលរដ្ឋរងគ្រោះមួយចំនួនបានជម្លៀសមកកាន់ទីទួលសុវត្ថិភាព ក្រោយពីបានទទួលរងការលិចលង់ដោយទឹកជំនន់ ស្ទឹងព្រែកត្នោត ធ្លាយទំនប់សន្តស្ទឹង កាលពីយប់ម៉ិញនេះ។
ឯកឧត្តមអភិបាលរាជធានីភ្នំពេញ បានបែងចែកក្រុមការងាររបស់រដ្ឋបាលរាជធានីភ្នំពេញជា៣ក្រុម សហការជាមួយអាជ្ញាធរខណ្ឌ និងកម្លាំងពាក់ព័ន្ធមួយចំនួនទៀត ដោយបានជិះទូកនិងអូប័រតាមខ្នងផ្ទះនីមួយៗ ដើម្បីចែកអំណោយជូនប្រជាពលរដ្ឋ ដោយផ្ទាល់ ។
អំណោយដែលត្រូវចែកជូនប្រជាពលរដ្ឋជាបន្ទាន់នេះ មានសង្កាត់ចំនួន៤ រួមមានសង្កាត់សាក់សំពៅ សង្កាត់ស្ពានថ្ម សង្កាត់ទៀន និងសង្កាត់គងនយ ។
គួរបញ្ជាក់ថា ទំនប់សន្តស្ទឹងព្រែកត្នោតបានធ្លាយកាលពីព្រលប់ថ្ងៃទី ១៣ខែតុលា បណ្ដាលឱ្យសង្កាត់មួយចំនួននៅក្នុងនៅក្នុងខណ្ឌដង្កោ ទទួលរងការលិចលង់ បើទោះបីអាជ្ញាធររាជធានីភ្នំពេញដឹកនាំដោយ ឯកឧត្តម ឃួង ស្រេង និងកងកម្លាំង កងអង្គរក្សប្រើគ្រឿងចក្រជាច្រើនគ្រឿង ដើម្បីទប់ស្កាត់តាំងពីពេលរសៀលថ្ងៃទី១៣ តុលា រហូតដល់ពេលយប់ថ្ងៃដដែលក៏ដោយចុះ ហើយមកដល់ពេលនេះផ្លូវចាក់កៅស៊ូលេខ ២១A (ផ្លូវចេញពីរង្វង់មូលគួរស្រូវមកសង្កាត់រលួស និងសង្កាត់ទៀន ក៏ទឹកកំពុងតែហូរពីលើថ្នល់ផងដែរ នាម៉ោង១០និង៣០ព្រឹកថ្ងៃទី១៤តុលានេះ ហើយក្រុមការងារ ទាំងរដ្ឋបាលរាជធានី និងកងអង្គរក្សក៏បាននឹងកំពុងប្រើគ្រឿងចក្រដើម្បីទប់ផងដែរ តែមិនដឹងថា ផ្លូវមួយខ្សែនេះអាចធានាបានឬយ៉ាងណានោះទេ។
មកដល់ម៉ោង១១នេះ ឯកឧត្តម ស ថេត ស្នងការនគរបាលរាជធានីភ្នំពេញ និង ឯកឧត្តម រ័ត្ន ស្រ៊ាង មេបញ្ជាការកងរាជអាវុធហត្ថរាជធានី ក៏បាននឹងកំពុងចុះផ្ទាល់ដើម្បីបញ្ជាកម្លាំងចុះជួយជម្លៀសប្រជាពលរដ្ឋផងដែរ។
ក្នុងការចុះសួរសុខទុក្ខ និងចែកអំណោយជូប្រជាពលរដ្ឋនេះ ឯកឧត្តម ឃួង ស្រេង អភិបាលរាជធានីភ្នំពេញ បានគោរពថ្លែងអំណរគុណដល់សម្តេចតេជោ ហ៊ុន សែន ដែលបានផ្តល់ថវិកា១០ម៉ឺនដុល្លារ សម្រាប់ជួយសង្គ្រោះប្រជាពលរដ្ឋដោយសារទឹកជំនន់នៅក្នុងរាជធានី៕
