ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ខណៈដែលឯកឧត្តម ចុះចែកអំណោយជូនបងប្អូនកម្មករ កម្មការិនីរោងចក្រចំនួន៥០០គ្រួសារ ដែលត្រូវបានបិទខ្ទុបលំនៅដ្ឋាន ដើម្បីបង្ការទប់ស្កាត់នូវជំងឺកូវីដ-១៩ នៅទីតាំងផ្ទះជួលចំនួន៣កន្លែង នៅក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ កាលពីរសៀល ថ្ងៃទី១០ ខែមេសា ឆ្នាំ២០២១នេះ បានធ្វើការអំពាវនាវ ក៏ដូចជាការស្នើសុំ ដល់បងប្អូនទាំងអស់មិនគួរធ្វើទំនាក់ទំនងគ្នា ជជែកគ្នា ឬសួរសុខទុក្ខគ្នាពីផ្ទះមួយទៅផ្ទះមួយនោះទេ គឺត្រូវស្នាក់នៅក្នុងផ្ទះរបស់ខ្លួនឲ្យដាច់ដោយឡែកពីគ្នា ដើម្បីកាត់បន្ថយឲ្យបាននូវការឆ្លងរាលដាលនូវជំងឺកូវីដ-១៩ទាំងអស់គ្នា។
ឯកឧត្តម ឃួង ស្រេង បានមានប្រសាសន៍ថា៖ការបិទខ្ទប់លំនៅដ្ឋានរបស់បងប្អូនប្រជាពលរដ្ឋគឺធ្វើឡើងដោយការបង្ខំចិត្ត ដើម្បីទប់ស្កាត់នូវការឆ្លងរីករាលដាលនៃជំងឺកូវីដ-១៩។ ដូច្នេះសូមបងប្អូនមេត្តាយោគយល់។ ម្យ៉ាងវិញទៀត ខណៈដែលបងប្អូនកំពុងបិទភូមិដ្ឋាននេះ បងប្អូនដាច់ខាតមិនគួរធ្វើទំនាក់ទំនង ជជែកគ្នាលេងឬ សាកសួរសុខទុក្ខគ្នាពីផ្ទះមួយទៅផ្ទះមួយនោះទេ។ យើងគួររួមគ្នាទប់ស្កាត់ឲ្យបាននូវការរីករាលដាលជំងឺកូវីដ-១៩ ទាំងអស់គ្នា ខណៈដែលជំងឺនេះ បាននឹងកំពុងរីករាលដាល និងបានធ្វើឲ្យបងប្អូនកម្មករកម្មការិនីរបស់យើងចំនួន៦៣៨នាក់ហើយ ដែលបានឆ្លងនូវជម្ងឺដ៏កាចសាហាវនេះ ។
ឯកឧត្តម ឃួង ស្រេង បានបញ្ជាក់ថា ៖ អំណោយដែលបងប្អូនកម្មករ កម្មការិនី ទាំង៥០០គ្រួសារទទួលបាននេះ គឺជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចគតិព្រឹទ្ធបណ្ឌិតប៊ុនរ៉ានីហ៊ុនសែន ដោយក្នុងមួយគ្រួសារ ទទួលបានថវិកា ៣០ម៉ឺនរៀល អង្ករ២៥គីឡូក្រាម ត្រីខ ២០កំប៉ុង និងមី១កេស ។
គួរបញ្ជាក់ថា ៖សម្ដេចតេជោនាយករដ្ឋមន្ត្រី បានដាក់បទបញ្ជាមួយចំនួនដល់អភិបាលរាជធានី-ខេត្ត អនុវត្តនូវការងារមួយចំនួន ពាក់ព័ន្ធនិងជម្ងឺកូវីដ-១៩ ក្នុងនោះ ៖
កម្មករ-កម្មការិនី ដែលពាក់ព័ន្ធនឹងកូវីដ-១៩ និងពាក់ព័ន្ធជាមួយនឹងការធ្វើចត្តាឡីស័ក រដ្ឋនឹងបង់ជំនួសនូវថ្លៃទឹក និងថ្លៃអគ្គិសនីក្នុងរយៈពេល២ខែ (បើនៅម្នាក់ឯងក៏ត្រូវចាត់ទុកថាមួយគ្រួសារផងដែរ) ៕
