រដ្ឋបាលរាជធានីភ្នំពេញ សហការជាមួយក្រសួងសុខាភិបាល បានសម្រេចជ្រើសរើសយកទីតាំងពហុកីឡាដ្ឋានជាតិអូឡាំពិក ធ្វើជាកន្ដែងសម្រាប់យកសំណាកប្រជាពលរដ្ឋដែលសង្ស័យថាមានជំងឺ covid -19 ក្នុងព្រឹត្តិការណ៍សហគមន៍ ២៨វិច្ឆិកា នៅថ្ងៃទី០៨ធ្នូខាងមុខនេះ។
ដើម្បីអោយដំណើរការនៃការរៀបចំទីតាំងថ្មីខាងលើនេះ ដំណើរការទៅបានរលូន ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល នាល្ងាចថ្ងៃទី០៣ធ្នូនេះ បានដឹកនាំមន្ត្រី និងអាជ្ញាធរចុះពិនិត្យទីតាំងខាងលើជាមួយនឹងការណែនាំអោយរៀបចំ សណ្ដាប់ធ្នាប់ ការរៀបចំណតសម្រាប់បងប្អូនប្រជាពលរដ្ឋដែលត្រូវមកពិនិត្យយកសំណាកជាលើកទី២ និងការរៀបចំរោងបំពាក់ដោយម៉ាស៊ីនត្រជាក់ និងបង្គន់អនាម័យផងដែរ។
ឯកឧត្តម ឃួង ស្រេង ក្នុងឱកាសនោះ បានណែនាំអោយមន្ត្រី និងកម្លាំងពាក់ព័ន្ធ ក្នុងនាមជាអាជ្ញាធរដែនដី នឹងប្រើប្រាស់កម្លាំងប្រមាណ៥០នាក់ ដើម្បីជួយទៅលើការរៀបចំសណ្តាប់ធ្នាប់ សន្តិសុខពីខាងក្នុង និងក្រៅពហុកីឡាដ្ឋានជាតិអូឡាំពិកនេះ។
លោកជំទាវ យក់ សម្បត្តិ បានមានប្រសាសន៍បញ្ជាក់ថា ការជ្រើសរើសយកទីតាំងពហុថាពហុកីឡាដ្ឋានជាតិអូឡាំពិក ដោយសារទីតាំងខាងលើមានលក្ខណៈធំទូលាយ យើងនឹងបង្រួមកន្លែងពិនិត្យយកសំណាកដែលមានជាច្រើនកន្លែងនៅក្នុងរាជធានីភ្នំពេញ មកប្រមូលផ្ដុំគ្នាតែមួយកន្លែង នៅពហុកីឡាដ្ឋានជាតិអូឡាំពិកនេះ។ដោយឡែក ការពិនិត្យយកសំណាកនៅក្រសួងមហាផ្ទៃ និងស្ថាប័នជាតិមួយចំនួនទៀត គឺយើងនៅរក្សាដដែល ដោយរក្សាដើម្បីពិនិត្យយកសំណាកជាលើកទី២ សម្រាប់មន្ត្រីជាន់ខ្ពស់របស់រាជរដ្ឋាភិបាល ។
លោកជំទាវ ក៏បានបញ្ជាក់ផងដែរថា ទីតាំងខាងលើនេះ នឹងធ្វើជាកន្លែងត្រួតពិនិត្យយកសំណាកចំពោះប្រជាពលរដ្ឋដែលសង្ស័យថា មានជម្ងឺកូវីដ–១៩ ចំនួនប្រមាណ៥០០០ ទៅ៦០០០នាក់ នាថ្ងៃទី ០៨ ខែធ្នូ ខាងមុខនេះ។
លោកជំទាវក៏បានបញ្ជាក់ផងដែរថា ពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា ក្រសួងសុខាភិបាលបានធ្វើការពិនិត្យសំណាក ទៅលើជនសង្ស័យដែលបានពាក់ព័ន្ធនឹងកូវីដ–១៩នេះ ចំនួន៨០០០នាក់ ក្នុងនោះយើងបានរកឃើញប្រជាពលរដ្ឋដែលមានវិជ្ជមានកូវីដ–១៩ ចំនួន១៩នាក់។ ប៉ុន្តែទោះបីជាយ៉ាងណាក្តី ការងារនេះមិនទាន់បញ្ចប់ទេ ដោយក្រុមការងាររបស់ក្រសួង នឹងពិនិត្យយកសំណាក់នៅថ្ងៃ០៨ធ្នូ ជាលើកទី២ និងជាលើកទី៣ និង១២ធ្នូខាងមុខ៕
