ព្រឹកថ្ងៃទី០៨ ខែកញ្ញា ឆ្នាំ២០១៤ ឯកឧត្តម ប៉ា សុជាតិវង្ស អភិបាល នៃគណៈអភិបាលរាជធានីភ្នំពេញ អញ្ជើញជាអធិបតីក្នុងពិធី បើកការដ្ឋានជួសជុលផ្លូវលេខ ៥៩៨ ស្ថិតក្នុងភូមិសាស្ត្រ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ។
តាមរបាយការណ៍ របស់មន្ទីរជំនាញ និងអជ្ញាធរមូលដ្ឋាន បានឱ្យដឹងថា ផ្លូវលេខ៥៩៨នេះមានសភាពទ្រុឌទ្រោម និងមានគ្រលុកសំបុកមាន់ ដោយសារកត្តាមួយចំនួនដូចជា អាយុកាលនៃការប្រើប្រាស់ កត្តាធម្មជាតិ ការដឹកជញ្ជូនខុសបច្ចេកទេស និងភាពទ្រុឌទ្រោមនៃបណ្តាញលូមេសង្ខាងផ្លូវ ដែលបានធ្វើឱ្យបងប្អូនប្រជាពលរដ្ឋមានការលំបាកធ្វើដំណើរ និងដឹកជញ្ជូនផលិតផលផ្សេងៗ ។ ស្ថិតក្នុងស្ថានភាពនេះសាលារាជធានីភ្នំពេញ បានសម្រេចពិនិត្យលទ្ធភាពស្វែងរកក្រុមហ៊ុនម៉ៅការសាងសង់ ដើម្បីចុះកិច្ចសន្យាជួសជុលកំណាត់ផ្លូវនេះ ដែលជាលទ្ធផលត្រូវបានសាលារាជធានីភ្នំពេញ ប្រគល់ជូន ក្រុមហ៊ុន CCES Engineering Services Co., Ltd ធ្វើការជួសជុលដោយត្រូវចាក់បេតុងអារម៉េ កម្រាស់២០សង់ទីម៉ែត្រ មានប្រវែង ៣.២៥០ម៉ែត្រ ទទឹង១៥ម៉ែត្រ ផ្ទៃក្រឡាសរុប ៤៨.៧៥០ម២ ។
ទន្ទឹមនេះក៏មានការរៀបចំចិញ្ចើមផ្លូវ ដោយក្រាលថ្មម៉ិក ១,៥ម៉ែត្រ សង្ខាងផ្លូវ និងត្រូវរៀបចំខឿនបេតុងសុវត្ថិភាពបែងចែកទិសចរាចរណ៍លើទ្រូងផ្លូវ ដាំបង្គោលភ្លើងបំភ្លឺផ្លូវ ដោយរក្សាគម្លាតពីមួយទៅមួយ ៤០ម៉ែត្រ ចំនួន៨១ដើម ដាក់លូទំហំ១,២០ម៉ែត្រ សង្ខាងផ្លូវ សរុបប្រវែង ៦.៥០០ម៉ែត្រ ព្រមទាំងត្រូវលាបគំនូសចរាចរ និងដាក់ស្លាកសញ្ញាចរាចរ ចាប់ពីរង្វង់មូលកាំកូស៊ីធី ដល់ចំណុច PK3+250 ។
