លេខទូរស័ព្ទ ពិគ្រោះយោបល់ និងព្យាបាលអ្នកមានជំងឺកូវីដ-១៩តាមផ្ទះ

ខណ្ឌចំការមន

ខណ្ឌដូនពេញ

ខណ្ឌ៧មករា

ខណ្ឌទួលគោក

ខណ្ឌដង្កោ

ខណ្ឌ​មានជ័យ

ខណ្ឌ​ឫស្សីកែវ

ខណ្ឌ​សែនសុខ

ខណ្ឌ​ពោធិ៍សែនជ័យ

ខណ្ឌ​ជ្រោយចង្វារ

ខណ្ឌ​ព្រែកព្នៅ

ខណ្ឌ​ច្បារអំពៅ

ខណ្ឌ​បឹងកេងកង

ខណ្ឌ​កំបូល

                 ក្នុងមហាសន្និបាតប្រចាំឆ្នាំលើកទី៣៩ និងខួបលើកទី៤០ នៃកំណើតសមាគមអន្ដរជាតិ នៃអភិបាលក្រុងប្រើប្រាស់ភាសាបារាំង ដែលកម្ពុជាធ្វើជាម្ចាស់ផ្ទះ នៅព្រឹកថ្ងៃទី០៤ ខែធ្នូ ឆ្នាំ២០១៩នេះ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានលើកឡើងថា ដោយសារតែនយោបាយឈ្នះឈ្នះ របស់សម្ដេចតេជោ ហ៊ុន សែន ទើបកម្ពុជាបញ្ចប់សង្គ្រាមដ៏រ៉ាំរ៉ៃបានដោយជោគជ័យ និងមានការអភិវឌ្ឍដូចបច្ចុប្បន្ននេះ។

ឯកឧត្តម ឃួង ស្រេង បានគូសបញ្ជាក់ទៀតថា ក្នុងទសវត្សន៍ឆ្នាំ៧០ រាជធានីភ្នំពេញ បានរងសង្គ្រាមទម្លាក់គ្រាប់បែក និងធ្លាក់ចូលក្នុង សង្រ្គាមរវាងខ្មែរ និងខ្មែរ។ របបប្រល័យពូជសាសន៍ខ្មែរក្រហម បានអូសបន្លាយជិត៣ឆ្នាំ ពីឆ្នាំ១៩៧៥ ដល់ឆ្នាំ១៩៧៩ ហើយធ្វើឲ្យរាជធានីកម្ពុជាមួយនេះ ក្លាយជាទីក្រុងខ្មោច គ្មានមនុស្សរស់នៅ គ្មានការគោរពសិទ្ធិមនុស្ស។

អភិបាលរាជធានីភ្នំពេញ បានបន្ដទៀតថា ក្រោយថ្ងៃរំដោះ ០៧ មករា ឆ្នាំ១៩៧៩ ភ្នំពេញត្រូវបានស្តារបន្តិចម្តងៗ ស្របតាមដំណើរវិវត្តន៍ នៃបរិការណ៍ជាក់ស្តែងនីមួយៗហើយបច្ចុប្បន្ននេះ ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា រាជធានីភ្នំពេញបានស្គាល់សាជាថ្មី នូវការអភិវឌ្ឍ។

ឯកឧត្តម ឃួង ស្រេង ថ្លែងយ៉ាងដូច្នេះថា «នយោបាយឈ្នះឈ្នះ របស់សម្តេចបានធ្វើឲ្យសង្គ្រាមស៊ីវិលរ៉ាំរ៉ៃបានបញ្ចប់ជាស្ថាពរ នាំមកនូវការបង្រួបបង្រួមជាតិ និងសុខសន្តិភាពពេញលេញជូនកម្ពុជា បង្កើតបានជាមូលដ្ឋានគ្រឹះ សម្រាប់បង្កើតរបបគ្រប់គ្រងដឹកនាំរដ្ឋបាលសាធារណៈ និងអភិវឌ្ឍសេដ្ឋកិច្ចកម្ពុជា នាពេលបច្ចុប្បន្ន។ ជោគជ័យ និងវិបុលភាពជាប់ជាប្រចាំ ក្នុងរយៈពេល០២ទសវត្សរ៍ចុងក្រោយ គឺជាផលដែលបានមកពីការដាក់ចេញនូវនយោបាយវិមជ្ឈការ និងវិសហមជ្ឈការ ដោយផ្សារភ្ជាប់ជាមួយនឹងនយោបាយលើកទឹកចិត្តវិនិយោគផ្ទាល់ពីបរទេស»។

ឯកឧត្តម ឃួង ស្រេង ក៏បានថ្លែងអំណរគុណដល់ សមាគម AIMF ដែលបានផ្តល់កិត្តិយសដល់រាជធានីភ្នំពេញ ធ្វើជាម្ចាស់ផ្ទះដើម្បីប្រារព្ធពិធីនាពេលនេះ។ អង្គសន្និបាតនាពេលនេះ ប្រារព្ធឡើងជាចៃដន្យចំពេលផុសឡើងនូវ ឧស្សហកម្មជំនាន់ទី៤ ដែលគេសម្គាល់បានដោយសារ លក្ខណៈពិសេស នៃការកកើតឡើងនូវ បញ្ញាសិប្បនិម្មិត និន្នាការសេដ្ឋកិច្ចឌីជីថល ព្រមទាំងនិន្នាការថ្មីនៃការគ្រប់គ្រងទីក្រុងឆ្លាតវៃ ដោយពិចារណាយ៉ាងមធ្យ័ត ដល់ការប្រែប្រួលអាកាសធាតុ ដូចមានគំនិតផ្តួចផ្តើមថ្មីក្នុងតំបន់អាស៊ាន ដែលមានឈ្មោះថា «បណ្តាញទីក្រុងវៃឆ្លាត អាស៊ាន» ជាតឹកតាងស្រាប់៕

           ឯកឧត្តម ហោ ណាំហុង ឧបនាយករដ្ឋមន្ត្រី តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃប្រទេសកម្ពុជា មានបំណងចង់អោយគ្រួសារ AIMF មានសាមគ្គីភាព សុខដុមរមនា ដើម្បីអោយ AIMF និង Francophonie ក្លាយជា “តំបន់សន្តិភាព ភាតរភាព និងការអភិវឌ្ឍប្រកបដោយចីរភាព។
        ការស្នើឡើង ដែលបានបង្ហាញពីបំណងបែបនេះរបស់ ឯកឧត្តមឧបនាយករដ្ឋមន្ត្រី ហោ ណាំហុង បានធ្វើឡើងកាលពីព្រឹកថ្ងៃទិ០៤ ធ្នូ ២០១៩ ក្នុងមហាសន្និបាតលើកទី៣៩ នៃសមាគមអន្តរជាតិនៃអភិបាលក្រុងហ្វ្រង់កូហ្វូន (A.L.M.F)នៅសណ្ឋាគារសុខារេស៊ីដង់ភ្នំពេញ សង្កាត់ជ្រោយចង្វារ ខណ្ឌជ្រោយចង្វារ។ ឯកឧត្តម ឧបនាយករដ្ឋមន្ត្រី ហោ ណាំហុង បានមានប្រសាសន៍លើកឡើងថា ឯកឧត្តមពិតជារីករាយណាស់ ដែលរាជធានីភ្នំពេញត្រូវបានជ្រើសរើសសម្រាប់រៀបចំមហាសន្និបាតAIMF នេះ។ ឯកឧត្តមឧបនាយករដ្ឋមន្ត្រីបន្តថា ថ្ងៃ២ធ្នូ ឆ្នាំ១៩៧៨ គឺជាថ្ងៃនៃការបង្កើតរណសិរ្សសាមគ្គីសង្គ្រោះជាតិ ដើម្បីផ្តួលរំលំរបបខ្មែរក្រហម និងកាលបរិច្ឆេទមួយទៀត ថ្ងៃទី២ ខែធ្នូ ឆ្នាំ១៩៨៧ ក៏ជាថ្ងៃដែលសម្តេចនាយករដ្ឋមន្ត្រី ហ៊ុន សែន ចាប់ផ្តើមចរចាជាមួយ សម្តេចឪ នរោត្តម សីហនុ នៅFère en Tardenois ប្រទេសបារាំង ដែលនាំឱ្យមានការចុះហត្ថលេខាលើកិច្ចព្រមព្រៀងទីក្រុងប៉ារីស ក្នុងឆ្នាំ១៩៩១។ កាលបរិច្ឆេទេជាប្រវត្តិសាស្រ្ត ថ្ងៃទី២ ខែធ្នូនេះហើយ ដែលនាំឱ្យកម្ពុជាធ្វើដំណើរឆ្ពោះទៅរកការបញ្ចប់របបប្រល័យពូជសាសន៍ខ្មែរក្រហម នៅថ្ងៃទី៧ ខែមករា ឆ្នាំ១៩៧៩ និងម៉្យាងវិញទៀត បានបញ្ចប់សង្គ្រាមស៊ីវិលដែលអនុញ្ញាតឱ្យការរស់រានឡើងវិញនិងការធ្វើទំនើបកម្មរាជធានីភ្នំពេញដូចសព្វថ្ងៃនេះ។ ឯកឧត្តម បន្តថា បន្ទាប់ពីរបបខ្មែរក្រហមបានដួលរលំទៅ រាជធានីភ្នំពេញគឺជាទីក្រុងខ្មោច គ្មានមនុស្សរស់នៅទេប្រជាជនទីក្រុងភ្នំពេញទាំងមូលត្រូវបានជម្លៀសចេញដោយបង្ខំ ឱ្យទៅធ្វើពលកម្មនៅតាមទីជនបទ និងក្នុងព្រៃ ដែលធ្វើអោយទីក្រុងភ្នំពេញជាទីក្រុងដ៏សោកសង្រេងមួយ។ យើងត្រូវចិញ្ចឹម និងផ្តល់ជម្រកជូនប្រជាជនរងភាពអត់ឃ្លានរាប់លាននាក់ ដែលទើបត្រឡប់មកពីជំរំធ្វើការដោយបង្ខំ យើងត្រូវកសាងរាល់ហេដ្ឋារចនាសម្ព័ន្ធទីក្រុងទាំងអស់ឱ្យសក្តិសមនឹងកេរ្តិ៍ឈ្មោះរាជធានីមួយនេះ ក៏ដូចជាហេដ្ឋារចនាសម្ព័ន្ធផ្សេងទៀតនៅទូទាំងប្រទេស ដែលត្រូវបានបំផ្លាញទាំងស្រុងដោយរបបប្រល័យពូជសាសន៍ខ្មែរក្រហម។ ចាប់ពីឆ្នាំ២០០០មក ទីក្រុងនេះបានប្រឈមនឹងបញ្ហាបន្ទាន់ថ្មីៗទៀត ដោយប្រជាជនបានចាកចេញពីជនបទចូលមករស់នៅ ដែលទាមទារឱ្យមានការសាងសង់លំនៅដ្ឋាននៅតាមសង្កាត់បណ្តោះអាសន្នមួយចំនួន។ ចាប់ពីឆ្នាំ២០០៤មក ទីក្រុងបានចាប់ផ្តើមការពង្រីកវិសាលភាពរបស់ខ្លួន ចាប់ផ្តើមឈានចូលដល់ដំណាក់កាលធ្វើឧស្សាហកម្មភាវូបនីយកម្ម ដោយបានបង្កើតការងារជាច្រើននៅតាមរោងចក្រវាយនភ័ណ្ឌ។           រដ្ឋាភិបាលមានកាតព្វកិច្ចដាក់ចេញនូវយុទ្ធសាស្រ្តពីរ ទី១). មានឈ្មោះថា “កម្មវិធីដើម្បីអភិវឌ្ឍសហគមន៍ចំនួន១០០ក្នុងមួយឆ្នាំ” ដោយអនុវត្តគោលនយោបាយផ្តល់សម្បទានដីសង្គម រួមនឹងការអភិវឌ្ឍទីលំនៅដ្ឋាននៅនឹងកន្លែង តាមរយៈផែនការប្រមូលផ្តុំប្រជាជនក្នុងសហគមន៍ក្រីក្របញ្ចូលគ្នាតាមតំបន់។ និងទី២) គឺការអភិវឌ្ឍហេដ្ឋារចនាសម្ព័ន្ធរូបវន្ត ដោយផ្អែកលើគោលការណ៍ “ស្វ័យអភិវឌ្ឍទីក្រុង” តាមរយៈមូលនិធិបដិភាគដែលចូលរួមដោយប្រជាពលរដ្ឋ។ រហូតមកដល់ឆ្នាំ២០០៩ សញ្ញាដំបូងដែលបង្ហាញថា រាជាធានីភ្នំពេញបានក្លាយជាទីក្រុងធំ ចេញជារូបរាងឡើង។ លំនៅដ្ឋានតូចៗត្រូវបានជំនួសដោយអគារខ្ពស់ៗ។ កាលនោះ រាជធានីភ្នំពេញបានពង្រីកវិសាលភាព ពី៣០០គីឡូម៉ែត្រក្រឡា ទៅដល់ជិត ៧០០គីឡូម៉ែត្រក្រឡា ជាមួយបូរីថ្មីៗចំនួន២១២កន្លែង ដោយមិនទាន់រាប់បញ្ចូលអគារខ្ពស់ៗរាប់មិនអស់ និងផ្ទះវីឡាជាច្រើនដែលគេបានសង់លើផ្ទៃដីក្រុងដ៏ធំនាពេលបច្ចុប្បន្ននេះ ជាមួយនឹងប្រជាជនទីក្រុង និងកម្មករ សរុបទាំងអស់ប្រមាណ ៣លាននាក់ ដែលជួលឬទិញផ្ទះល្វែងនិងវីឡាដើម្បីរស់នៅ។ ហេដ្ឋារចនាសម្ព័ន្ធផ្លូវថ្មីត្រូវបានកសាង និងពង្រីកដោយសារមានការកកស្ទះចរាចរណ៍នៅលើដងផ្លូវ ដូចតាមបណ្តារដ្ឋធានីដទៃទៀតនៅអាស៊ីអាគ្នេយ៍ដូច្នោះដែរ។ នេះក៏ដោយសារតែជីវភាពរស់នៅរបស់ប្រជាជនមានភាពប្រសើរឡើង ដោយសារតែកម្ពុជាទទួលបានកំណើនសេដ្ឋកិច្ចដល់ទៅ៧.៧% ក្នុងរយៈពេលពីរទសវត្សរ៍កន្លងមកនេះដែលអនុញ្ញាតឲ្យយើងកាត់បន្ថយអត្រាភាពក្រីក្រមកនៅត្រឹម១០%ប៉ុណ្ណោះក្នុងឆ្នាំ២០១៨។ ក្នុងឱកាសនោះ ដែរ ឯកឧត្តម ហោ ណាំហុង បានលើកឡើងជាសំណើរមូយចំនួនដើម្បីធ្វើឱ្យសមាគម AIMF ក្លាយជាយន្តការពហុភាគី ជាប្រយោជន៍ដល់ការអភិវឌ្ឍប្រកបដោយចីរភាពនៃបណ្តាទីក្រុងនិយាយភាសាបារាំង។ ក្នុងនោះឯកឧត្តមស្នើអោយមានការលើកកម្ពស់កិច្ចសហប្រតិបត្តិការនៅក្នុងសមាគមAIMF ដោយផ្លាស់ប្តូរវេទិកានេះឲ្យទៅជាបណ្តាញរួមគ្នាមួយ ដែលនឹងបង្កើតជាគុណតម្លៃបន្ថែមដល់ហ្វ្រង់កូហ្វូនី។ ត្រូវរៀបចំឱ្យទីក្រុងនានាសហការគ្នា ដើម្បីសម្រេចបាននូវគុណតម្លៃនិង គោលដៅនានារបស់ AIMF ។ ត្រូវមានកម្មវិធីបណ្តុះបណ្តាល “អនាគតអ្នកដឹកនាំរបស់ AIMF” ឲ្យពួកគាត់ជ្រាបពីគោលការណ៍គ្រឹះនៃអត្តសញ្ញាណរបស់ AIMF ដើម្បីឱ្យមានគ្រួសារ AIMF មួយដែលមានសាមគ្គីភាពសុខដុមរមនា និងដើម្បីធ្វើឲ្យ AIMF និង Francophonie ក្លាយទៅជា “តំបន់សន្តិភាព ភាតរភាព និងការអភិវឌ្ឍប្រកបដោយចីរភាព” ។ចំណែកចំណុចចុងក្រោយគឺ ព្រឹត្តិការណ៍កីឡា វប្បធម៌ និងទេសចរណ៍ នៅក្នុង AIMF អាចបង្កើតកាលានុវត្តភាណវប្បធម៌ និងទេសចរណ៍ថ្មីៗ ដើម្បីកសាងកិត្តិនាមរបស់ AIMF នៅលើពិភពលោក។

ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានមានប្រសាសន៍លើកឡើងថា រាជធានីភ្នំពេញ ជាទីតាំងមួយដែលមានវប្បធម៌-អារ្យធម៌សំបូរបែប ចម្រុះជាតិសាសន៍ និងប្រវត្តិសាស្រ្តយូរលង់ និងទទួលបានកិត្តិសព្ទថាជាទីក្រុងដែលប្រកបដោយ ភាពសុខដុមរម្យនា និងមានការអធ្យាស្រ័យខ្ពស់។ រចនាបទស្ថាបត្យកម្មនេះ ជាលទ្ធផលនៃការសំយោគជំនឿដើមរបស់បុព្វបុរសខ្មែរ បញ្ចូលជាមួយនឹងជំនឿដែលមានប្រភពមកពីព្រហ្មញ្ញសាសានានិងពុទ្ធសាសនា។ក្នុងទសវត្សន៍ឆ្នាំ៧០ រាជធានីភ្នំពេញបានរងសង្គ្រាមទម្លាក់គ្រាប់ បែក និងធ្លាក់ចូលក្នុងសង្រ្គាមរវាងខ្មែរនិងខ្មែរ។ របបប្រល័យ ពូជសាសន៍ខ្មែរក្រហម បានអូសបន្លាយជិត ៣ឆ្នាំ ពីឆ្នាំ១៩៧៥ ដល់ឆ្នាំ១៩៧៩ ហើយធ្វើឱ្យរាជធានីកម្ពុជាមួយនេះ ក្លាយជាទីក្រុងខ្មោច គ្មានមនុស្សរស់នៅ គ្មានការគោរពសិទ្ធិមនុស្ស។ ក្រោយថ្ងៃរំដោះ ០៧ មករា ឆ្នាំ១៩៧៩ ភ្នំពេញត្រូវបានស្តារបន្តិចម្តងៗ ស្របតាមដំណើរវិវត្តន៍នៃបរិការណ៍ជាក់ស្តែងនីមួយៗ ហើយបច្ចុប្បន្ននេះ ក្រោមការដឹកនាំប្រកបដោយគតិបណ្ឌិតរបស់ សម្តេច អគ្គមហា សេនាបតីតេជោ ហ៊ុន សែន រាជធានីភ្នំពេញបានស្គាល់សាជាថ្មីនូវការអភិវឌ្ឍ។ឯកឧត្តមបន្តថា ក្នុងរយៈពេល ០២ ទសវត្សរ៍ ចុងក្រោយនេះ គឺជាផលដែលបានមកពីការដាក់ចេញនូវនយោបាយវិមជ្ឈការ និងវិសហមជ្ឈការ ដោយផ្សារភ្ជាប់ជាមួយនឹងនយោបាយលើកទឹកចិត្តវិនិយោគផ្ទាល់ពីបរទេស។ អង្គសន្និបាតនាពេលនេះ ប្រារព្ធឡើងចំពេលផុសឡើងនូវឧស្សហកម្មជំនាន់ទី៤ ដែលគេសម្គាល់បានដោយសារលក្ខណៈពិសេសនៃការកកើតឡើងនូវបញ្ញាសិប្បនិម្មិត និន្នាការសេដ្ឋកិច្ចឌីជីថល ព្រមទាំងនិន្នាការថ្មីនៃការគ្រប់គ្រងទីក្រុងឆ្លាតវៃ ដោយពិចារណា យ៉ាងមធ្យ័តដល់ការប្រែប្រួលអាកាសធាតុ ដូចមានគំនិតផ្តួចផ្តើមថ្មីក្នុងតំបន់អាស៊ាន ដែលមានឈ្មោះថា “បណ្តាញទីក្រុងវៃឆ្លាតអាស៊ាន”ជាតឹកតាងស្រាប់។

លោកស្រីល្វីស៏ មូស៊ីគីវ៉ាបូ (Louise Mushikiwabo ) អគ្គលេខាធិការអង្គការអន្តរជាតិ នៃប្រទេសប្រើប្រាស់ភាសាបារាំង (ឡា ហ្វ្រង់កូហ្វ្រូនី “La Francophonie”)បានមានប្រសាសន៍លើកឡើងដែរថា ខួបលើទី៤០នៃសមាគមអន្តរជាតិនៃអភិបាលក្រុងហ្វ្រង់កូហ្វូន (A.L.M.F) គឺចំ ខួប៤០ឆ្នាំនៃការរំដោះប្រទេសកម្ពុជាក៏ដូចរំដោះទីក្រុងភ្នំពេញចេញពីរបបប្រល័យពូជសាសន៍ដែលធ្វើអោយកម្ពុជាត្រូវកសាងប្រទេសឡើងវិញពីចំណុចសូន្យ។ តែក្រោមការដឹកនាំរបស់ថ្នាក់ដឹកនាំនៃប្រទេសនេះបានធ្វើអោយប្រទេសមួយនេះនិងទីក្រុងភ្នំពេញ មានការអភិវឌ្ឍ រីកចំរើន ដែលនេះជាបទពិសោធន៍ និងជាគំរូដ៏ល្អសម្រាប់បណ្តាទីក្រុងដែលជាសមាជិកនៃសមាគមអន្តរជាតិនៃអភិបាលក្រុងហ្វ្រង់កូហ្វូន (A.L.M.F)យកទៅអនុវត្ត ដើម្បីអោយទីក្រុងរបស់ខ្លួនទទួលបានជោគជ័យ៕

           ឯកត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក ប៉ាទ្រីក​ ឃ្លូម៉ង់ អភិបាលរងទីក្រុងបារីស បានឯកភាពក្នុងការចុះកិច្ចព្រមព្រៀងលើគម្រោងរៀបចំតំបន់ស្ទឹងមានជ័យ និងពង្រឹងសមត្ថភាពការរៀបចំផែនការនគរូបនីយកម្ម និងការគ្រប់គ្រងដីធ្លី ដែលពិធីនេះបានធ្វើឡើងកាលពីល្ងាចថ្ងៃទី០៣ ធ្នូ ឆ្នាំ២០១៩នៅសណ្ឋាគារសុខារេស៊ីដង់ភ្នំពេញសង្កាត់ជ្រោយចង្វារខណ្ឌជ្រោយចង្វារ។

            ការចុះកិច្ចព្រមព្រៀងនេះដើម្បីពង្រឹងសមត្ថភាពអាជ្ញាធរថ្នាក់ក្រោមជាតិនៅកម្ពុជា ក្នុងការរៀបចំផែនការ នគរូបនីយកម្មនិងការគ្រប់គ្រងដីធ្លី ដើម្បីកែប្រែមុខមាត់សហគមន៍មិនទាន់រៀបរយ និងធានានូវលទ្ធភាពក្នុងការទទួលបាននូវសេវាសាធារណៈជាសារវ័ន្ត។

គោលបំណងនៃគម្រោងក្នុងកិច្ចព្រមព្រៀងនេះ គឺដើម្បីរៀបចំឡើងវិញនៅតំបន់ស្ទឹងមានជ័យ និងពង្រឹងសមត្ថភាពរបស់រដ្ឋបាលរាជធានីភ្នំពេញ ក្នុងវិស័យការរៀបចំផែនការនគរូបនីយកម្មនិងការគ្រប់គ្រងដីធ្លី ក្នុងក្របខណ្ឌកិច្ចសហប្រតិបត្តិការវិមជ្ឈការរវាងទីក្រុងប៉ារីសនិងរាជធានីភ្នំពេញ។

គម្រោងនេះត្រូវបានបង្កើតឡើងដោយផ្អែកលើលទ្ធផលរំពឹងទុកមួយចំនួនដូចជាស្ថានភាពរស់នៅរបស់ប្រជាពលរដ្ឋដែលរស់នៅក្នុងតំបន់ងាយរងគ្រោះ/តំបន់ជាយក្រុងនៃ “សហគមន៍នៅជាយក្រុងតាមប្រឡាយស្ទឹងមានជ័យដែលមានទីតាំងនៅខណ្ឌមានជ័យនៃរាជធានីភ្នំពេញ ត្រូវបានកែលម្អដោយមានការពង្រឹងនូវការសម្របសម្រួលរវាងសេវាកម្មជាក់លាក់។ ការពង្រឹងសមត្ថភាពរបស់ភ្នាក់ងារនានា ការបង្កើតហេដ្ឋារចនាសម្ព័ន្ធសហគមន៍ក្នុងក្របខណ្ឌកិច្ចសហប្រតិបត្តិការរវាងសាលាក្រុងប៉ារីសនិងរដ្ឋបាលរាជធានីភ្នំពេញ។

គាំទ្រដល់ការរៀបចំសហគមន៍មូលដ្ឋានកិច្ចពិភាក្សាជាមួយអាជ្ញាធរមូលដ្ឋាន និងកំណត់ពីតម្រូវការក្នុងវិស័យហេដ្ឋារចនាសម្ព័ន្ធសហគមន៍។ ពង្រឹងសមត្ថភាពទីចាត់ការផែនការនិងវិនិយោគនៃរដ្ឋបាលរាជធានីភ្នំពេញ និងទំនាក់ទំនងរបស់ទីចាត់ការក្នុងសាលារាជធានី និងខណ្ឌ។ ធ្វើបច្ចុប្បន្នភាពឯកសារផែនការរៀបចំខណ្ឌមានជ័យនិងកំណត់ពីតម្រូវការក្នុងវិស័យហេដ្ឋារចនាសម្ព័ន្ធ។ បញ្ជ្រៀបចំណេះដឹងនិងពង្រឹងសមត្ថភាពរបស់សហគមន៍ក្នុងការប្រើប្រាស់សម្ភារៈបរិក្ខាថ្មីៗ។ កសាងដំណោះស្រាយសម្រាប់លំនៅដ្ឋានប្រកបដោយនិរន្តរភាព(៥០% នៃលំនៅស្ថានត្រូវសាងសង់/កែលម្អ) និងហេដ្ឋារចនាសម្ព័ន្ធសហគមន៍(សាលារៀនឬមណ្ឌលសុខភាព/ភ្លើងនៅតាមផ្លូវសាធារណៈទីលានលេងកីឡាការរៀបចំទីក្រុងផ្លូវថ្នល់សួនច្បារសាធារណៈនិងផ្លូវសំរាប់កង់៕

ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានស្នើអោយអ្នកវិនិយោគឡាវវិនិយោគបន្ថែមលើវិស័យពាណិជ្ជកម្ម និងទេសចរណ៍នៅប្រទេសកម្ពុជា ដើម្បីអោយប្រទេសទាំងពីរមានការអភិវឌ្ឍរីកចំរើនដូចគ្នាខណៈដែលប្រទេសទាំងពីរមានវប្បធម៌ប្រពៃណីទំនៀមទំលាប់ប្រហាក់ប្រហែលគ្នា និងមានភូមិផងរបងជាមួយគ្នាផងដែរនោះ។

            ឯកឧត្តម ឃួង ស្រេង បានស្នើបែបនេះខណៈជួបពិភាក្សាការងារនិងសម្តែងការគួរសមជាមួយ ឯកឧត្តម បណ្ឌិតស៊ីនឡាវង់បូតដៃធូ អភិបាលរដ្ឋធានីវៀងចន្ទន៍នៅសាលារាជធានីភ្នំពេញកាលពីព្រឹកថ្ងៃទី០២ធ្នូ២០១៩នេះ។

            ឯកឧត្តមបណ្ឌិតស៊ីនឡាវង់បូតដៃធូ បានមានប្រសាសន៍លើកឡើងផងដែរថាការដែល​ឯកឧត្តម​អញ្ជើញមករាជធានីភ្នំពេញនេះ គឺមានបំណងពីរទីមួយគឺចូលរួមក្នុងកិច្ចប្រជុំសមាគមអន្តរជាតិអភិបាលក្រុងប្រើប្រាស់ភាសាបារាំង(AIMF)ដែលរាជធានីភ្នំពេញធ្វើជាម្ចាស់ផ្ទះ។ ទី២មានគោលបំណងមកជួបសំដែងការគួរសមនិងពិភាក្សាការងារជាមួយអភិបាលនៃគណៈអភិបាលរាជធានីភ្នំពេញ ដើម្បីរិតចំណងមិត្តភាពសហប្រតិបត្តិការពិសេសការចងសម្ព័ន្ធមេត្រីភាពរវាងរាជធានីភ្នំពេញ និងទីក្រុងវៀងច័ន្ទន៍ឲ្យកាន់តែល្អប្រសើរមួយកម្រិតថែមទៀត៕

          សន្និសីទស្តីពី“ទីក្រុងដែលមានភាពធន់ការគិតគូរអំពីបញ្ហាប្រឈមនិងការស្ថាបនាទីក្រុងឡើងវិញ” នៃមហាសន្និបាតលើកទី៣៩របស់សហគមអន្តរជាតិនៃអភិបាលក្រុងប្រើប្រាស់ភាសាបារាំង (AIMF) បាននឹងកំពុងប្រារព្ធឡើងនៅសណ្ឋាគារសុខារេស៊ីដង់ភ្នំពេញនាព្រឹកថ្ងៃទី ០៣ ខែធ្នូ ឆ្នាំ២០១៩នេះ ដោយបានទទួលស្វាគមន៍  គណៈប្រតិភូនៃទីក្រុងនិងសមាគមរដ្ឋបាលថ្នាក់ក្រោមជាតិចំនួន៤០២នាក់មកពី៤១ប្រទេសទូទាំងពិភពលោក។

ឯកត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងនាមជាម្ចាស់ផ្ទះក្នុងឱកាសនោះបានថ្លែងក្នុងពិធីបើកសន្និសីទ​ស្តីពី“ទីក្រុងដែលមានភាពធន់ការគិតគូរអំពីបញ្ហាប្រឈមនិងការស្ថាបនាទីក្រុងឡើងវិញ” នៃមហាសន្និបាតលើកទី៣៩របស់សហគមអន្តរជាតិ នៃអភិបាលក្រុងប្រើប្រាស់ភាសាបារាំង (AIMF : Association Internationale des Maires Francophones) ដោយមានការចូលរួមពីសមាជិករដ្ឋសភា និងប្រធានក្រុមប្រឹក្សារាជធានីភ្នំពេញដែលជាអតីតអភិបាលរាជធានីភ្នំពេញ លោកព្យែរប៊ែយំ(PIERRE BAILLET)លេខាធិការអចិន្ត្រៃយ៍នៃសមាគមអន្តរជាតិនៃអភិបាលក្រុងប្រើប្រាស់ភាសាបារាំង។

ឯកត្តម ឃួង ស្រេង បានមានប្រសាសន៍ថាមហាសន្និបាតលើកទី៣៩ របស់សមាគមអន្តរជាតិនៃអភិបាលក្រុងប្រើប្រាស់ភាសាបារាំងគឺជាព្រឹត្តការណ៍ប្រវត្តិសាស្រ្តសម្រាប់សមាគម AIMF និយាយជារួម និងនិយាយដោយឡែកសម្រាប់រាជធានីភ្នំពេញ ដើម្បីឈានទៅពង្រឹងនិងពង្រីកកិច្ចសហប្រតិបត្តិការកាន់តែស៊ីជម្រៅនិងទូលំទូលាយទាំងក្នុងក្របខ័ណ្ឌទីក្រុងជាមួយសមាគមនិងទីក្រុង ជាមួយទីក្រុងដែលជាសមាជិកសមាគមអន្តរជាតិ នៃអភិបាលក្រុងប្រើប្រាស់ភាសាបារាំង។ រាជធានីភ្នំពេញពិតជាមានកិត្តិយសនិងមោទនភាពបំផុតដោយបានទទួលធ្វើជាម្ចាស់ផ្ទះនៃមហាសន្និបាតលើកទី៣៩របស់សមាគមអន្តរជាតិ នៃអភិបាលក្រុងប្រើប្រាស់ភាសាបារាំងដោយដំណើរទស្ស    នកិច្ច ជាផ្លូវការរបស់គណៈប្រតិភូនៃទីក្រុងនិងសមាគមរដ្ឋបាលថ្នាក់ក្រោមជាតិ ចំនួន៤០២នាក់ អញ្ជើញមកពី៤១ប្រទេសទូទាំងពិភពលោក។

រដ្ឋបាលរាជធានីភ្នំពេញ បង្ហាញពិព័រណ៍រូបភាពរយៈពេល៤០ឆ្នាំ របស់រាជធានីភ្នំពេញ ដើម្បីបង្ហាញឲ្យប្រជាពលរដ្ឋ និងភ្ញៀវបរទេសបានស្វែងយល់ពីការវិវឌ្ឍរបស់រាជធានីភ្នំពេញចេញពីបាតដៃទទេ ហើយមានការអភិវឌ្ឍន៍រីកចំរើនមកដល់សព្វថ្ងៃនេះ។

រូបភាពភាពជាច្រើនផ្ទាំង ដែលពិពណ៌នាអំពីស្ថានភាពរាជធានីភ្នំពេញ ក្នុងរយៈពេល៤០ឆ្នាំ ចាប់ពីឆ្នាំ១៩៧៩ ដល់ឆ្នាំ២០១៩ នេះត្រូវបានដាក់បង្ហាញជាសាធារណៈប្របតាមដងទន្លេសាប នៅលើផ្លូវថ្មើរជើង ក្រោយសាលសន្និសីទចតុមុខ នារសៀលថ្ងៃទី០១ ខែធ្នូ ឆ្នាំ២០១៩ ដែលមានមនុស្សម្នាចូលទស្សនាយ៉ាច្រើនកុះករ។

ពិព័រណ៍រូបភាពនេះ ត្រូវបានផ្សព្វផ្សាយដើម្បីអបអរសាទរ ក្នុងឱកាសដែររាជធានីភ្នំពេញ ធ្វើជាម្ចាស់ផ្ទះ រៀបចំមហាសន្និបាតសមាគមអន្តរជាតិ នៃអភិបាលក្រុងប្រើប្រាស់ភាសាបារាំង (AIMF) លើកទី៣៩ ចាប់ពីថ្ងៃទី០៣ ដល់ថ្ងៃទី០៤ ខែធ្នូ ឆ្នាំ ២០១៩។

ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានឲ្យដឹងថា ពិព័រណ៍រូបភាពនេះ នឹងធ្វើឲ្យមហាជន បានយល់ពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការស្វែងរកសន្តិភាព និងការស្ថាបនារាជធានីភ្នំពេញ ព្រមទាំងប្រទេសកម្ពុជាទាំងមូលបានយ៉ាងល្អស្រស់ឆើតឆាយ ចេញពីបាតដៃទទេក្រោយភ្នក់ភ្លើង សង្គ្រាម។

លោក ជែ ប៉ាយ៉េ តំណាងសមាគមអន្តរជាតិ នៃអភិបាលក្រុងប្រើប្រាស់ភាសាបារាំង (AIMF) បានកោតសរសើររាជធានីភ្នំពេញ ថារៀបចំពិព័រណ៍រូបភាពនេះបានល្អ ដើម្បីឲ្យប្រជាពលរដ្ឋនៅតែចងចាំពីការដឹកនាំដ៏ត្រឹមត្រូវរបស់រាជរដ្ឋាភិបាល ដែលធ្វើឲ្យទីក្រុងនេះមានការអភិវឌ្ឍរីកចម្រើនគួរកត់សម្គាល់។

លោកបានបញ្ជាក់ថា រាជធានីភ្នំពេញនឹងក្លាយជាទីក្រុងគំរូសម្រាប់សមាជិកទីក្រុងអភិបាលក្រុងប្រើប្រាស់ភាសាបារាំង (AIMF) នៅទ្វីបអាហ្រិកដើម្បីអនុវត្តតាម។

សូមបញ្ជាក់ថា ពិព័រណ៍រូបភាពរយៈពេល៤០ឆ្នាំរបស់រាជធានីភ្នំពេញនេះ ត្រូវបានសម្រិតសម្រាំងរូបភាពរហូតដល់ជាង២ពាន់សន្លឹក ដែលបានមកពីក្រុមផលិតករថតរូបកម្ពុជា និងបរទេស។

គួរំលឹកផងដែរថា នៅរសៀលថ្ងៃទី០១ ខែធ្នូនេះ រដ្ឋបាលរាជធានីភ្នំពេញ និងសមាគមអន្តរជាតិ នៃអភិបាលក្រុងប្រើប្រាស់ភាសាបារាំង (AIMF) បានរួមគ្នាសម្ពោធឧបករណ៍កម្សាន្តកុមារនិងឧបករណ៍ហាត់ប្រាណ នៅសួនព្រះនាងប្រាជ្ញបារមី ស្ថិតនៅខណ្ឌជ្រោយចង្វា រាជធានីភ្នំពេញ ដើម្បីជាប្រយោជន៍ដល់ប្រជាជន និងសង្គមជាតិ៕

រដ្ឋបាលរាជធានីភ្នំពេញ នៅថ្ងៃទី០២ ដល់ថ្ងៃទី០៤ ខែធ្នូ ឆ្នាំ២០១៩ខាងមុខនេះ នឹងធ្វើជាម្ចាស់ផ្ទះ នៃមហាសន្និបាតសមាគមអន្ដរជាតិ នៃអភិបាលក្រុងប្រើប្រាស់ភាសាបារាំង (AIMF) ក្រោមប្រធានបទ «ទីក្រុងដែលមានភាពធន់ ការគិតគូពីបញ្ហាប្រឈម និងការស្ថាបនាទីក្រុងឡើងវិញ» ដែលមានប្រតិភូជាង៤០ប្រទេសចូលរួម។ ថ្លែងក្នុងសន្និសីទសារព័ត៌មាន ជុំវិញការរៀបចំមហាសន្និបាតនេះ ឯកឧត្តម នួន ផារ័ត្ន អភិបាលរង នៃ គណៈអភិបាលរាជធានីភ្នំពេញ នៅព្រឹកថ្ងៃទី២៩ ខែវិច្ឆិកា ឆ្នាំ២០១៩នេះ បានឲ្យដឹងថា រាជធានីភ្នំពេញ ត្រូវបានគណៈកម្មាធិការអអចិន្ត្រៃយ៍របស់ AIMF ក្នុងកិច្ចប្រជុំលើកទី៣៨របស់ AIMF នៅទីក្រុងលីល ប្រទេសបារាំង កាលពីថ្ងៃទី៥ដល់ថ្ងៃទី៧ ខែវិច្ឆិកា ឆ្នាំ២០១៨កន្លងទៅ បានជ្រើសរើសធ្វើជាម្ចាស់ផ្ទះនៃកិច្ចប្រជុំលើកទី៣៩។ បើតាម ឯកឧត្តម នួន ផារ័ត្ន ការធ្វើជាម្ចាស់ផ្ទះ គឺជាឧិកាសដ៏មានតម្លៃដែលរាជធានីភ្នំពេញ បង្ហាញស្នាដៃ និងបទពិសោធន៍ ក្នុងការអភិវឌ្ឍន៍ទីក្រុងដែលងើបចេញពី វាលពិឃាតប្រល័យពូជសាសន៍រហូត មានការអភិវឌ្ឍរីកចម្រើនលើគ្រប់វិស័យក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី។ ឯកឧត្តម អភិបាលរង នៃគណៈអភិបាលរាជធានីភ្នំពេញ បានអះអាងទៀតថា នៅក្នុងអាស៊ីអាគ្នេយ៍ មានតែរាជធានីភ្នំពេញ មួយគត់ ដែលជាសមាជិក សមាគម អន្តរជាតិ អភិបាលក្រុងប្រើប្រាស់ភាសាបារាំង (AIMF) ដែលមានផលប្រយោជន៍ដើម្បីបង្ហាញទៅដល់ទីក្រុង ២៩៤ទីក្រុងទៀត ពីភាពរឹងមាំ ពីសក្តានុពល ជូនទៅប្រទេសទាំងនោះ ពីបញ្ហាវិនិយោគ បេតិកភណ្ឌពិភពលោក។ ឯកឧត្តម រំពឹង និងជឿជាក់ថា តាមរយៈការធ្វើជាម្ចាស់ផ្ទះនេះ រាជធានីភ្នំពេញ និយាយដោយឡែក និងនិយាយជារួម ប្រទេសកម្ពុជាទាំងមូល នឹងទទួលបានបទពិសោធន៍ថ្មីបន្ថែមទៀត និងជាឱកាសបង្ហាញអំពីការរីកចម្រើនរបស់ប្រទេសកម្ពុជា ទៅប្រទេសផ្សេងទៀតនៅក្នុងពិភពលោក។ ឆ្លៀតក្នុង ឱកាស នៃកិច្ចប្រជុំ ប្រតិភូប្រទេសដែលមកចូលរួម នឹងធ្វើទស្សនកិច្ចទៅកាន់ទឹកដីអង្គរ នៃខេត្តសៀមរាបផងដែរ ដើម្បី ទស្សនាប្រាសាទរបស់កម្ពុជា។ សូមជម្រាបថា សមាគមអន្ដរជាតិអភិបាលក្រុងប្រើប្រាស់ភាសាបារាំង ត្រូវបានបង្កើតឡើងតាំងពីឆ្នាំ១៩៧៩ ដើម្បីចងក្របប្រទេសប្រើប្រាស់ភាសាបារាំង ក្នុងន័យផ្លាស់ប្ដូរបទពិសោធន៍ និងគំនិតល្អឲ្យគ្នាទៅវិញទៅមក។ រាជធានីភ្នំពេញ បានចូលជាសមាជិកនៃសមាគមនេះ នៅឆ្នាំ១៩៩០ ហើយបានក្លាយជាសមាជិកអចិន្ដ្រៃយ៍ នៅឆ្នាំ២០០៣៕